Վիրահայոց թեմը ակտիվորեն դատական գործընթացների մեջ մտած փորձում է լուծել եկեղեցիների հարցը. Շիրակ Թորոսյան

Այսօր Վրաստանի տարածքում հայկական եկեղեցիների խնդրի լուծման համար լավ հնարավորություն կա, որովհետեւ վիրահայոց թեմը բավականին ակտիվորեն դատական գործընթացների մեջ մտած փորձում է հարցեր լուծել: Այս մասին այսօր՝ մարտի 23-ին, շաբաթօրյակի շրջանակներում Օղակաձեւ զբոսայգում NEWS.am-ի հետ զրույցում նշեց «Իմ քայլը» խմբակցության պատգամավոր Շիրակ Թորոսյանը՝ նկատելով, որ եկեղեցիների պատկանելիության, օգտագործման, տնօրինման ծիսական արարողություններ կատարելու հարցերն ի հայտ են եկել հետխորհրդային շրջանում:

Նրա խոսքով, առաջներում, Վրաստանի նախկին իշխանության ժամանակ գրեթե անհնար էր այդպիսի քայեր կատարելը եւ այդ առումով առաջընթաց կա:

Ամենայն Հայոց կաթողիկոս Գարեգին Երկրորդի հետ հանդիպման ժամանակ Զուրաբիշվիլին՝ անդրադառնալով այդ հարցին, հայտարարել է, թե Վրաստանն է պատասխանատու իր տարածքում պատմական հուշարձանների վերականգնման համար, սակայն, դա պետք է արվի քայլ առ քայլ:

Զուրաբիշիվիլին առաջարկել է գիտական փորձաքննություն անցկացնել եւ պարզել որոշ եկեղեցիների ծագումնաբանությունը, եկեղեցու ընտրության իրավունքն, ինչպես Վրաստանի նախագահն է ասել, Հայաստանինն է:

Նշենք, որ 19-րդ դարում կառուցված Թանդոյանցի Սուրբ Աստվածածին եկեղեցին վերադարձնելու պահանջով Վիրահայոց թեմը դիմել է դատարան։ Կիսավեր տաճարը, կառավարության որոշմամբ, փոխանցվել է Վրաց ուղղափառ եկեղեցուն՝ չնայած հայերի շարունակական բողոքներին:

News.am