«Ցավոք, Հայաստանի իշխանություններին չհաջողվեց որևէ օրինակով ցույց տալ, որ ամենակարևոր հարցերը Վրաստանի իշխանությունների հետ իրենք կարողանում են լուծել»,– այսօր լրագրողների հետ հանդիպմանը հայտարարեց «Ժառանգություն» կուսակցության անդամ, համանուն խմբակցության ղեկավար Ստեփան Սաֆարյանը՝ անդրադառնալով հայ–վրացական հարաբերություններին։
Ըստ Ստեփան Սաֆարյանի՝ երկկողմ խնդիրների լուծման համար հայկական կողմը օգտագործեց գրեթե բոլոր մեթոդները՝ «նեղանալուց մինչև մեդալաբաշխություն Վրաստանի նախագահին», սակայն որևէ արդյունքի չկարողացավ հասնել։ «Այն, ինչը պակասում է Հայաստանի իշխանություններին, իրավիճակի ճիշտ ախտորոշումն է»,– ասաց Ստեփան Սաֆարյանը։
Պատգամավորի խոսքով, Հայաստանը մինչ օրս կարողացել է Վրաստանի հետ լուծել միայն գազատարի կամ բեռների հետ կապված խնդիրներ, սակայն որևէ լուրջ խնդիր չի լուծել, անգամ «խուսափել է կազմել վրացահայության խնդիրներին վերաբերող օրակարգը»։ «Ոչ մի թթու խոսք չի ասվում»,– հայտարարեց Սաֆարյանը՝ նկատելով, թե Վրաստանը Հայաստանի հետ վարվում է այնպես, ինչպես ուզում է։
Ինչ վերաբերում է Վրաստանում գտնվող հայկական եկեղեցիների խնդրին, ապա Սաֆարյանը համոզված է, որ Հայ առաքելական եկեղեցու կարգավիճակը պետք է ճանաչվի Վրաստանում։
Tert.am | 
