Կրթության և գիտության նախարար Արմեն Աշոտյանի և Վրաստանի գիտության նախարար Դ. Շաշկինի միջև ձեռք բերված պայմանավորվածությունների շրջանակում օգոստոսի 25-28-ը ՀՀ ԿԳՆ Կրթության ազգային ինստիտուտի աշխատանքային խումբը (Վ. Ղանդիլյան` ղեկավար, Կ. Թորոսյան, Կ. Չիբուխչյան, Ա. Գյուլբուդաղյան, Ա. Մալոյան, Ն. Վիրաբյան, Ջ. Մաթևոսյան` մասնագետներ) Վրաստանում իրականացրել է 32-ժամյա վերապատրաստման դասընթացներ Վրաստանի հայերենով ուսուցմամբ դպրոցների «Հայոց պատմություն», «Հայոց լեզու», «Գրականություն» առարկաներ և տարրական դպրոցում դասավանդող ուսուցիչների համար:
Դասընթացները տեղի են ունեցել Քութայիսի քաղաքի Զ. Ժվանիայի անվան պետական կառավարման դպրոցում, որին մասնակցել է Ախալքալաքից, Նինոծմինդայից, Ասպինձայից, Բորժոմիից, Մառնեուլից, Թբիլիսիից և Ախալցխայից ժամանած 100 ուսուցիչ:
Ուսուցիչների հետ հանդիպելու և վերապատրաստումները ողջունելու նպատակով օգոստոսի 28-ին դպրոց են ժամանել ՀՀ ԿԳ նախարար Ա. Աշոտյանը և Վրաստանի ԿԳ նախարար Դ.Շաշկինը: Նրանք բարձր են գնահատել այսօրինակ դասընթացների նշանակությունը երկու բարեկամ ժողովուրդների համար: Ա. Աշոտյանը, ով ոչ պաշտոնական այցով էր գտնվում Վրաստանում, ողջունելով բոլոր ներկաներին, ասել է. «Մեր երկու հարևան, բարեկամ ժողովուրդների կրթական համակարգերի համագործակցությունը պետական մակարդակով գտնվում է իրականացման արդյունավետ փուլում: Հենց դա էլ հույս է ներշնչում, որ մեր հետագա գործունեությունն առավել սերտ ու արդյունավետ է լինելու»:
Նախարարների ելույթներից հետո վերապատրաստվող ուսուցիչներից խոսք է խնդրել Նինոծմինդայի Մեծ Խանչալի գյուղի դպրոցի պատմության ուսուցիչ Ռոբերտ Սքոյանը, ով ներկա գտնվող բոլոր ուսուցիչների անունից խորին շնորհակալություն ու երախտագիտություն է հայտնել Ա. Աշոտյանին և Դ. Շաշկինին, ՀՀ ԿԳՆ Կրթության ազգային ինստիտուտի տնօրինությանն ու նրա աշխատակիցներին:
Ինչպես հայտնում են ՀՀ ԿԳՆ մամլո ծառայությունից, վերապատրաստումների ավարտին բոլոր ուսուցիչները ցանկություն են հայտնել նմանօրինակ միջոցառումներ հաճախ կազմակերպել ու հնարավորության դեպքում իրականացնել տեղերում` ըստ ենթաշրջանների:
hetq.am |
