Եվրահանձնաժողովի նախագահ Ուրսուլա ֆոն դեր Լեյենը հստակեցրել է արևմտյան պատժամիջոցները, որոնք սպառնում են Ռուսաստանին Ուկրաինայի վրա հարձակման դեպքում և կրկին զգուշացրել ռուսական տնտեսության համար լայնածավալ հետևանքների մասին։ ԵՄ-ի և ԱՄՆ-ի կողմից ծրագրված պատժամիջոցները կոչված են «էապես կտրելու Ռուսաստանին միջազգային ֆինանսական շուկաներից», ասել է ֆոն դեր Լեյենը գերմանական ARD հեռուստաալիքի եթերում, գրում է Deutsche Welle-ն։
Տնտեսական առումով բոլոր պատժիչ միջոցները կկիրառվեն «այն ապրանքների նկատմամբ, որոնք Ռուսաստանին խիստ անհրաժեշտ են իր տնտեսությունը արդիականացնելու և դիվերսիֆիկացնելու համար, բայց որոնք արտադրվում են մեր երկրներում, որոնց համար մենք ունենք համաշխարհային առաջնորդություն, և որոնց Ռուսաստանը չի կարող փոխարինել»։
Ֆոն դեր Լեյենը, սակայն, դեմ է արտահայտվել պատժամիջոցների անհապաղ սահմանմանը, ինչպես պահանջում է Ուկրաինան՝ կապված երկրի արևելքում բռնության վերջին սրացման հետ: Ինչպես նշել է Եվրահանձնաժողովի ղեկավարը, Արևմուտքը դեռ հնարավորություն է տալիս Ռուսաստանին վերադառնալ դիվանագիտությանը և նորից նստել բանակցությունների սեղանի շուրջ։ «Եվ այս հնարավորությունների պատուհանը դեռ բաց է»,- ընդգծել է գերմանացի քաղաքական գործիչը։ Վերջնական որոշումն այժմ ամբողջությամբ կախված է նախագահ Վլադիմիր Պուտինից, ասաց նա։ Ֆոն դեր Լեյենը կարծում է, որ Ռուսաստանը «շատ ուշադիր լսում է մեր ասածը»:
Ռուսաստանի տնտեսությունը «գրեթե ամբողջությամբ կենտրոնացած է հանածո վառելիքի վրա, մասնավորապես՝ նավթի, ածուխի և գազի», — ասաց ֆոն դեր Լեյենը՝ հիշեցնելով, որ վառելիքն ու էներգետիկ արտադրանքները կազմում են ռուսական արտահանման երկու երրորդը և Ռուսաստանի Դաշնության պետական բյուջեի կեսը։