Վրաստանի խորհրդարանի նախագահ Շալվա Պապուաշվիլին նամակ է հղել Եվրոպայի խորհրդի Վենետիկի հանձնաժողովի նախագահ Քլեր Բազ Մալորիին, որում խնդրում է եզրակացություն պատրաստել Վրաստանի խորհրդարան ներկայացված երկու օրենքների նախագծերի վերաբերյալ։
«Վրաստանը գտնվում է տարածաշրջանային անվտանգության փոփոխվող բարդ միջավայրում։ Նման պայմաններում ի հայտ են գալիս նոր և կարևոր խնդիրներ, որոնց պետք է արձագանքել պետական գերատեսչությունները։ Այս խնդիրների արդյունավետ լուծման համար անհրաժեշտ են ինչպես բոլոր շահագրգիռ կողմերի թափանցիկության և հաշվետվողականության ավելի բարձր չափանիշներ, այնպես էլ անվտանգության մարտահրավերների ավելի լուրջ պատկերացում:
Այդ կապակցությամբ Վրաստանի խորհրդարանը որոշել է ընդունել նոր կանոնակարգ Վրաստանում գործող ոչ առևտրային/ոչ ձեռնարկատիրական կազմակերպությունների համար։ Խորհրդարան է ներկայացվել երկու օրենքի նախագիծ՝ «Օտարերկրյա ազդեցության թափանցիկություն» և «Օտարերկրյա գործակալների գրանցում»։ Օրենքների նախագծերը նպատակ ունեն ապահովել ոչ առևտրային/ոչ բիզնես կազմակերպությունների նվազագույն անհրաժեշտ թափանցիկությունը և հաշվետվողականությունը, ներառյալ օտարերկրյա ֆինանսավորումը:
Քանի որ Վրաստանը առաջ է գնում դեպի ԵՄ անդամակցություն, մենք ցանկանում ենք աշխատել մեր միջազգային գործընկերների հետ՝ ապահովելու լավագույն հավասարակշռությունը մի կողմից թափանցիկության և անվտանգության օրինական նպատակների և մյուս կողմից՝ քաղաքացիական հասարակության իրավունքների ու ազատությունների միջև:
Տասնամյակներ տեւած մեր գործընկերության ոգով մենք խնդրում ենք, որ Վենետիկի հանձնաժողովը պատրաստի իրավական եզրակացություն կից օրինագծերի վերաբերյալ։
Տիկին նախագահ, մենք անհամբեր սպասում ենք ձեզ հետ համագործակցությանը նշված հարցում»,- ասված է Շալվա Պապուաշվիլիի նամակում, որը տարածում է խորհրդարանի մամուլի գրասենյակը։
Այս մասին տեղեկանում ենք Վրաստանի առաջին ալիքի կայքից։