ԱՄՆ կոնգրեսականների խումբը կոչ է անում դադարեցնել ռազմական օգնությունն Ադրբեջանին

Այս շաբաթ Ադրբեջանի կողմից Արցախի շրջափակումն անցավ 100 օրվա սահմանագիծը, և ԱՄՆ 69 ներկայացուցիչներից բաղկացած երկկուսակցական խումբը՝ Կոնգրեսի հայկական հանձնախմբի հիմնադիր համանախագահ Ֆրենկ Փալոնի գլխավորությամբ, ևս մեկ անգամ կոչ արեց դադարեցնել ռազմական օգնությունն Ադրբեջանին ու 150 միլիոն դոլարի օգնություն տրամադրել Արցախին և Հայաստանին:

Հարցումը տրվել է նամակի տեսքով՝ ուղղված պետական-արտաքին գործառնությունների գծով հատկացումների ենթահանձնաժողովի նախագահ Մարիո Դիազ Բալարտին (հանրապետական՝ Ֆլորիդա նահանգից) և վարկանիշային անդամ Բարբարա Լիին (դեմոկրատ՝ Կալիֆոռնիա նահանգից), որոնք արդեն սկսել են մշակել ԱՄՆ Ներկայացուցիչների պալատի 2024 թ.  ֆինանսական տարվա արտաքին օգնության օրինագիծը:

Նամակը ներառում է հետևյալ բյուջետային պահանջները՝

-100 միլիոն դոլար Հայաստանին՝ անվտանգության, տնտեսական, կառավարման և օրենքի գերակայության աջակցության համար.

– 50 միլիոն դոլար Արցախին` Լեռնային Ղարաբաղի հայ բնակչության վերականգնման և վերաբնակեցման ջանքերում օգնության ու աջակցության համապարփակ ռազմավարություն տրամադրելու համար, ինչպես նաև լրացուցիչ 2 միլիոն դոլար՝ հումանիտար ականազերծման և չպայթած զինամթերքների մաքրման համար.

– Ադրբեջանին ԱՄՆ-ի ռազմական և անվտանգության բոլոր օգնության դադարեցումը և պետքարտուղարության գնահատումը մարդու իրավունքների խախտումներին ու պատերազմական հանցագործություններին աջակցող ադրբեջանական պաշտոնյաների դեմ պոտենցիալ պատժամիջոցների վերաբերյալ.

– Ադրբեջանի կողմից ապօրինի պահվող հայ ռազմագերիների ազատ արձակմանն ուղղված վարչակազմի ջանքերին աջակցող ձևակերպում:

Արցախի ավելի քան 50.000 կողմնակիցներ գրել են Թվիթերում և զանգահարել ԱՄՆ իրենց ներկայացուցչին՝ ստորագրելու Կոնգրեսի նամակը: