Եթե Թրամփին հաջողվի բանակցությունների սեղանի շուրջ նստեցնել Ուկրաինային և Ռուսաստանին, Զելենսկին պատրաստ է Ռուսաստանին առաջարկել տարածքների ուղղակի փոխանակում՝ Մոսկվային տալով Կուրսկի մարզում Կիևի հսկողության տակ գտնվող հողերը, գրում է բրիտանական The Guardian-ը։
«Մենք մի տարածքը կփոխանակենք մյուսի հետ»,- ասել է Ուկրաինայի նախագահը թերթի հետ հարցազրույցում` միաժամանակ խոստովանելով, որ դեռ չգիտի, թե Ռուսաստանի վերահսկողության տակ գտնվող հողերի որ մասը Կիևը կխնդրի դրա դիմաց։ «Չգիտեմ, կտեսնենք, մեր բոլոր տարածքները կարևոր են, առաջնահերթություն չկա»,- ընդգծել է նա։
Ուկրաինայի ղեկավարի խոսքով՝ ինքը պատրաստ է բանակցությունների Մոսկվայի հետ, բայց ցանկանում է, որ Կիևը դրանց մասնակցի «ուժի դիրքից»։
Ուկրաինայի նախագահը նաև հայտարարել է, որ եթե ԱՄՆ նախագահ Դոնալդ Թրամփի օրոք դադարեցվի աջակցությունն Ուկրաինային, ապա Եվրոպան միայնակ չի կարողանա լրացնել այդ բացը:
Ըստ նրա՝ երկրի անվտանգության համար չափազանց կարևոր է, որ ԱՄՆ ռազմական աջակցությունը շարունակվի։ Զելենսկին կրկնել է, որ պատրաստ է ամերիկյան ընկերություններին շահավետ պայմանագրեր առաջարկել վերականգնողական աշխատանքներ իրականացնելու համար, ինչպես նաև ներդրումային արտոնություններ՝ փորձելով Թրամփին իր կողմը գրավել: