აბასთუმნის შემოვლითი გზის შეკეთების კომპანიის დირექტორის დავით მელიქიძის მკვლელობის ფაქტზე გამოძიება რამდენიმე თვეა მიმდინარეობს. დღეს ახალციხის რაიონულ სასამართლოში მორიგი სასამართლო პროცესი გაიმართა. პროცესზე დაიკითხა ერთ-ერთი მთავარი მოწმე რომელიც, მკვლელობის დროს ადგილზე იმყოფებოდა.
მოწმის ჩვენების მიხედვით, მკვლელობის დღეს მან შენიშნა, რომ ერთ-ერთ ბრალდებულს ხელში ცეცხლსასროლი იარაღი ეჭირა. მოწმის თქმით, ბრალდებულები ჯერ მასთან მივიდნენ და მათ შორის ფიზიკური დაპირისპირება მოხდა.
როგორც მოწმე ამბობს დაპირისპირების დროს დაინახა, როგორ მირბოდა და ისროლა ერთ-ერთმა იმ მიმართულებით, სადაც გარდაცვლილი თანამშრომლებთან ერთად იმყოფებოდა. მისივე თქმით, სამი გასროლის ხმა გაიგო, თუმცა რა მიმართულებით ვერ აკონკრეტებს.
შემდეგი სასამართლო 2 მაისს გაიმართება.
შეგახსენებთ, რომ დაპირისპირება 2021 წლის 23 აპრილს მოხდა. შემთხვევის შედეგად ერთი პირი, დავით მელიქიძე, გარდაიცვალა, ხოლო მეორე, სოსო ვარდიძე დაიჭრა. გამოძიება სსკ-ს 108-ე მუხლით მიმდინარეობს, რაც განზრახ მკვლელობას გულისხმობს.
2021 წლის 14 ოქტომბერს პროკურატურის შუამდგომლობის საფუძველზე ბრალდებულებზე ინტერპოლის წითელი ცირკულარით საერთაშორისო ძებნა გამოცხადდა. სამართალდამცავებს ბრალდებულები ჯერ არ დაუკავებიათ და ისინი მიმალვაში იმყოფებიან.