ԱՄՆ նախագահ Դոնալդ Թրամփը հայտարարել է, որ Վաշինգտոնը դեմ չէ, որ ԵՄ երկրներից խաղաղապահներ ուղարկվեն Ուկրաինա՝ հետևելու հրադադարի պահպանմանը, եթե այն հաստատվի։
«Եթե նրանք ցանկանում են դա անել, հիանալի է: Հնարավոր խաղաղության պայմանագրի ստորագրումից հետո դա լավ քայլ կլիներ: Գիտեմ, որ Ֆրանսիան, Մեծ Բրիտանիան, մյուսները խոսել են այդ մասին»,- ասել է ԱՄՆ ղեկավարը: Միաժանակ նա նշել է, որ Ուկրաինայում ԱՄՆ խաղաղապահ զորակազմի ներկայության հարցն օրակարգային չէ, քանի որ Ամերիկան հեռու է Ուկրաինայից:
ԵՄ երկրների միջև դեռևս միասնական համաձայնություն չկա այս հարցում։ Ուկրաինայում զորքերի տեղակայմանը դեմ է Լեհաստանը: Այդ երկրի պաշտպանության նախարար Վլադիսլավ Կոսինյակ-Կամիշը կարծում է, որ Ռուսաստանին սահմանակից ոչ մի երկիր չպետք է մասնակցի Ուկրաինայում հնարավոր խաղաղապահ առաքելությանը։ Նրա կարծիքով՝ դա ռիսկային է նման երկրների համար՝ սադրանքների վտանգի պատճառով:
ԱՄՆ նախագահը միաժամանակ հասկացրել է, որ չի պատրաստվում ամերիկյան զորքը դուրս բերել Եվրոպայից: Լրագրողի հարցին՝ արդյոք նա պատրաստ է «որպես Պուտինի հետ խաղաղության համաձայնագրի մաս դիտարկել ամերիկյան զորքերը Եվրոպայից հանելու հարցը», Թրամփը պատասխանել է՝ իրեն ոչ ոք չի խնդրել դա անել: