Երուսաղեմի հայոց պատրիարքությունում դիմավորում են 44-օրյա պատերազմում վիրավորված վեց զինվորի և նրանց ուղեկցող անձնակազմին: Այդ մասին ասված է Երուսաղեմի հայոց պատրիարքարանի դիվանապետ Կորյուն վարդապետ Բաղդասարյանի Ֆեյսբուքի էջում:
«Ծրագիրը իրականանում է Երուսաղեմի հայոց պատրիարքության և հայրենի կառավարության համագործակցությամբ»,- նշված է գրառման մեջ:
44-օրյա պատերազմի ժամանակ Արցախում սպանվել կամ գերեվարվել է 80-ից ավելի քաղաքացիական անձ, որոնց տարհանումն ապահովված չի եղել, և իրավապահներն այժմ փորձում են պարզել մեղավորներին, հայտարարել է Արցախի գլխավոր դատախազ Գուրգեն Ներսիսյանը:
Նա տեղեկացրել է նաև, որ պատերազմից հետո սահմանադրական կարգի տապալման հատկանիշներով քրեական գործ է հարուցվել:
Հարցաքննվել են մի խումբ ներկա ու նախկին բարձրաստիճան պաշտոնյաներ: Մի շարք այլ գործերով Արցախի պետական բյուջե է վերադարձվել մոտ 500 միլիոն դրամ:
Անօթևան մնացած քաղաքացիներին կացարանով ապահովելու և հյուրատնային ծառայություններ մատուցելու գործընթացում, ըստ Արցախի դատախազի, եղել են պետական միջոցների հափշտակության դեպքեր: Հարուցվել է 9 քրեական գործ:
