Ապրիլի 11-ին Եվրահանձնաժողովի կողմից Վրաստանին փոխանված հարցաշարը լրացնելու ուղղությամբ ձեռնարկվելիք միջոցառումները քննարկվել են Վրաստանի ԵՄ ինտեգրման կառավարական հանձնաժողովի 62-րդ նիստում, որը վարել է վարչապետ Իրակլի Ղարիբաշվիլին, կառավարության աշխատակազմում։
Կառավարության ղեկավարը կարևորել է բոլոր գերատեսչությունների առավելագույն համակարգումը և ակտիվ ներգրավվածությունը՝ կարճ ժամանակում հարցաշարի լրացման գործընթացն արդյունավետ և ամբողջական դարձնելու համար։
«Մարտի 3-ին մենք ԵՄ անդամակցության հայտ ներկայացրինք՝ այդպիսով Վրաստան-Եվրամիություն հարաբերությունները նոր մակարդակի հասցնելով։ Իհարկե, այս որոշումը մեզ վրա մեծ պատասխանատվություն է դնում՝ ակտիվացնել մեր ջանքերը ԵՄ անդամակցության ճանապարհին։ Այսօրվա հանդիպմանը կքննարկենք ապրիլի 11-ին Եվրահանձնաժողովի կողմից ներկայացված հարցաշարը լրացնելու ուղղությամբ ձեռնարկվելիք միջոցառումները։ Արտաքին գործերի նախարարը Լյուքսեմբուրգում անձամբ հանդիպել է եվրահանձնակատար Վարհեի հետ, ով նրան է հանձնել հարցաթերթիկը։ Այսօր մենք հավաքվել ենք քննարկելու այն գործունեությունը, որը պետք է բոլորս միասին անցկացնենք։ Մեզ անհրաժեշտ է բոլոր գերատեսչությունների ներգրավվածությունը, առավելագույն համակարգումը, որպեսզի հնարավորինս արդյունավետ և արագ լրացնենք այս հարցաշարը և ժամանակին վերադարձնենք լրացված փաստաթուղթը»,- ասել է վարչապետը։
Հարցաշարի վերաբերյալ նիստի հիմնական զեկուցողն էր արտաքին գործերի նախարար Իլիա Դարչիաշվիլին։ Նշվել է, որ ԵՄ-ի կողմից հարցաշարի ներկայացումը նոր փուլ է ԵՄ-ի հետ հարաբերություններում։ Ինչպես հայտնի է, հարցաթերթիկը փոխանցվել է Ասոցացված եռյակի բոլոր երեք երկրներին՝ Վրաստանին, Ուկրաինային և Մոլդովային և գործընթացը կշարունակվի այս ձևաչափով։
Այս մասին տեղեկանում ենք Վրաստանի առաջին ալիքի կայքից։