Ռուսաստանի ԱԳՆ պաշտոնական ներկայացուցիչ Մարիա Զախարովան լրագրողների հետ ամենշաբաթյա ճեպազրույցում անդրադարձել է Հարավային Կովկասում հաղորդակցությունների ապաշրջափակման հարցին:
Զախարովայի խոսքով՝ Հայաստանի, Ադրբեջանի և Ռուսաստանի միջև ամենաբարձր մակարդակով ձեռք բերված եռակողմ համաձայնությունները պահպանում են արդիականությունը:
Նա շեշտել է՝ Մոսկվան միշտ ուրախ է աջակցել Երևանին և Բաքվին՝ առաջ մղելու հարաբերությունների կարգավորման գործընթացը։
«Լիարժեք գործակցության հնարավորինս շուտ վերսկսումը, իհարկե, կնպաստեր Հարավային Կովկասում կայուն խաղաղությանը և բարգավաճմանը։ Պատրաստ ենք աջակցել մեր գործընկերներին հաշտեցման հարցում։ Ռուսաստանի, Ադրբեջանի և Հայաստանի փոխվարչապետների համանախագահությամբ եռակողմ աշխատանքային խմբի շրջանակում տրանսպորտային և տնտեսական հաղորդակցությունների ապաշրջափակման հիանալի գաղափարներ են մշակվել։ Պատրաստ ենք ներկայացնել սահմանազատման և սահմանագծման ոլորտում մեր փորձը, քարտեզագրական եզակի նյութերը, օգնել հումանիտար հարցերում»,- նշել է ՌԴ ԱԳՆ խոսնակը։