Հունվարի 14-ը վրացական թատրոնի օրն է, որի կապակցությամբ Ախալցխայի քաղաքապետ Վարլամ Ծիկլաուրին հյուրընկալել է Մեսխեթիի պետական դրամատիկական և Ախալցխայի պետական տիկնիկային թատրոնների դերասաններին։
Տեղական ինքնակառավարման մարմինների ներկայացուցիչները շնորհավորել են դերասաններին մասնագիտական օրվա կապակցությամբ և շնորհակալագրեր հանձնել թատերական արվեստի ոլորտում երկարատև և բեղուն աշխատանքի համար։
«Ցանկանում եմ շնորհավորել ձեզանից յուրաքանչյուրին վրացական թատրոնի օրվա կապակցությամբ։ Անգնահատելի է ձեր ներդրումը մեր քաղաքի մշակութային և թատերական կյանքի զարգացման գործում։ Դուք այն մարդիկ եք, ովքեր այս թատրոնները դարձրել են մեր քաղաքապետարանի մաս և միշտ հետաքրքիր խաղացանկեր են առաջարկում ձեր հավատարիմ հանդիսատեսին։ Հիշում եմ, թե ինչ պայմաններում են տարիներ շարունակ աշխատել երկու թատրոններն էլ։ Բարեբախտաբար, հիմա ամեն ինչ փոխվում է, և դուք կշարունակեք ձեր մասնագիտական գործունեությունը արժանապատիվ միջավայրում։ Մաղթում եմ ձեզ հաջողություններ և ստեղծագործական առաջընթաց։ Ես հպարտ եմ ձեր գոյությամբ, իմ մեծ աջակցությունն ու սերն եմ հայտնում ձեզ», — դերասանների հետ հանդիպման ժամանակ ասել է Վարլամ Ծիկլաուրին։
Հանդիպմանը ներկա էին քաղաքային խորհրդի նախագահ Սաբա Կբիլաշվիլին, նրա տեղակալները և քաղաքապետարանի ներկայացուցիչները։
Միջոցառման ընթացքում ընդգծվեց տարածաշրջանում թատրոնների գոյության և դերասանների ներդրման հատուկ կարևորությունը։ Հատկանշական է, որ նրանց վաստակի շնորհիվ Ախալցխայի անունը բազմիցս է հնչել՝ ինչպես երկրի ներսում, այնպես էլ արտերկրում։