Վրաստանում ուսուցիչը, ինչպես նաև հանրակրթական ուսումնական հաստատության մեկ այլ աշխատակից, որի աշխատանքային պայմանագիրը դադարեցվում է աշակերտի նկատմամբ բռնության պատճառով, կսահմանափակվի հանրակրթական ուսումնական հաստատությունում աշխատանքից 3 տարով։
Սա այն նորամուծություններից մեկն է, որը կներդրվի «Հանրակրթության մասին» օրենքում նախատեսված փոփոխությունների շրջանակներում։
Գործող օրենքի համաձայն, աշակերտի նկատմամբ բռնության պատճառով դպրոցից ազատված ուսուցիչը որևէ սահմանափակում չունի այլ հանրակրթական ուսումնական հաստատությունում աշխատանքի անցնելու համար։
Նախաձեռնության հեղինակը Կրթության և գիտության նախարարությունն է։ Ըստ նախարարության՝ աշակերտի նկատմամբ ֆիզիկական բռնությունը ուսուցչի մասնագիտական էթիկայի և դպրոցական կանոնակարգի կոպիտ խախտում է և կասկածի տակ է դնում նրա՝ անվտանգ և աջակցող կրթական միջավայր ապահովելու կարողությունը։
Ըստ Կրթության և գիտության նախարարության՝ նման դեպքերում ուսուցչի/հանրակրթական ուսումնական հաստատության այլ աշխատակցի անհապաղ վերադարձը դպրոցի տարածք ռիսկեր է ստեղծում աշակերտների ֆիզիկական և հոգեբանական անվտանգության համար և բացասաբար է անդրադառնում դպրոցի նկատմամբ հանրային վստահության վրա։
«3 տարվա սահմանափակումը պատժիչ միջոց չէ, այլ կանխարգելիչ մեխանիզմ, որը նպատակ ունի կանխել նմանատիպ գործողությունները և միևնույն ժամանակ ուսուցչին հնարավորություն տալ շտկելու իր վարքագիծը և հասկանալու իր մասնագիտական պատասխանատվությունը։
Այս մոտեցումը կնպաստի կրթական տարածքում անվտանգության բարձր չափանիշի հաստատմանը, համապատասխանում է միջազգային պրակտիկային և կրթության ոլորտում սահմանված չափանիշներին, որոնք նախատեսում են ժամանակավոր մասնագիտական որակազրկում բռնության դեպքերում՝ որպես երեխայի իրավունքների պաշտպանության արդյունավետ գործիք», — նշում է Կրթության և գիտության նախարարությունը։
«Հանրակրթության մասին» օրենքում փոփոխությունները խորհրդարանում են։ Դրանք քննարկվում են արագացված կարգով։