Վրաստանի վարչապետ Իրակլի Կոբախիձեն հանդիպել է նահանգապետերի, մունիցիպալիտետների քաղաքապետերի և շրջանների սակրեբուլոների նախագահների հետ։
Կառավարության աշխատակազմի տվյալներով՝ կառավարության ղեկավարը կենտրոնացել է շրջանների երկարաժամկետ զարգացման և կենտրոնական ու տեղական ինքնակառավարման մարմինների միջև համակարգման կարևորության վրա, որը կնպաստի կարևոր նախագծերի արդյունավետ իրականացմանը։ Հանդիպման ընթացքում անդրադարձ է եղել նաև կառուցվածքային ստորաբաժանումների օպտիմալացմանը։
«Կենտրոնական կառավարության և տեղական ինքնակառավարման մարմինների միջև սերտ համակարգումը շատ կարևոր է։ Շատ նախագծեր տեղական մակարդակով իրականացվում են նախարարությունների կողմից, և կարևոր է մունիցիպալիտետների ներգրավվածությունը։ Մենք նաև անդրադարձել ենք սոցիալական աջակցության հարցերին։ Այս հիմքերը պետք է վերանայվեն, և մենք ակտիվորեն կաշխատենք այս հարցի շուրջ՝ մունիցիպալիտետների ներգրավմամբ։ Մենք նաև կենտրոնացել ենք կոռուպցիայի կանխարգելման կարևորության վրա։ Այս առումով շատ կարևոր քայլեր են ձեռնարկվել։ Կարևոր է, որ մենք հնարավորինս կանխենք կոռուպցիոն դրսևորումները տեղական ինքնակառավարման մակարդակում», — նշել է Իրակլի Կոբախիձեն։
Հանդիպմանը մասնակցել են Վրաստանի խորհրդարանի նախագահ Շալվա Պապուաշվիլին, ենթակառուցվածքների նախարար Ռևազ Սոխաձեն, տարածաշրջանային զարգացման նախարար Կախաբեր Գուլեդանին, Պետական անվտանգության ծառայության պետ Մամուկա Մդինարաձեն, տարածաշրջանային քաղաքականության և ինքնակառավարման հարցերով խորհրդարանական կոմիտեի նախագահ Իրակլի Քադագիշվիլին, կոմիտեի անդամ Դիմիտրի Սամխարաձեն, Աջարիայի Ինքնավար Հանրապետության կառավարության նախագահ Սուլխան Թամազաշվիլին և Աջարիայի Ինքնավար Հանրապետության Գերագույն խորհրդի նախագահ Դավիթ Գաբաիձեն։