ՄՊՀ նախագահ Գեղամ Գևորգյանը մասնակցել է «5+1» ձևաչափով նիստին, Բելառուսի Հանրապետության հակամենաշնորհային կարգավորման մարմնի 30-ամյակի միջոցառումներին, հանդիպել է Բելառուսի Հանրապետության իր գործընկերոջ հետ: Այդ մասին ասված է Մրցակցության պաշտպանության հանձնաժողովի Ֆեյսբուքի էջում:
Մինսկ կատարած այցի շրջանակում ՄՊՀ նախագահ Գեղամ Գևորգյանը մասնակցել է ԵԱՏՄ անդամ պետությունների մրցակցային մարմինների ղեկավարների և Եվրասիական տնտեսական հանձնաժողովի մրցակցության և հակամենաշնորհային կարգավորման հարցերով կոլեգիայի անդամի (նախարարի) մակարդակով անցկացվող «5+1» ձևաչափով հերթական նիստին: Նիստի շրջանակում ՄՊՀ նախագահը ելույթ է ունեցել, որի ընթացքում անդրադարձել է ակցիաների, այդ թվում՝ զեղչերի իրականացման ոլորտում կատարված օրենսդրական վերջին փոփոխություններին:
Այցի ընթացքում Գեղամ Գևորգյանը երկկողմ հանդիպում է ունեցել Բելառուսի Հանրապետության հակամենաշնորհային կարգավորման և առևտրի նախարար Ալեքսեյ Բոգդանովի հետ: Քննարկվել են երկու երկրների մրցակցային մարմինների միջև կնքված հուշագրի շրջանակում համագործակցության խթանմանը վերաբերող, ինչպես նաև այլ հարցեր:
Մրցակցության պաշտպանության հանձնաժողովի նախագահը մասնակցել է նաև Բելառուսի Հանրապետության հակամենաշնորհային կարգավորման 30-ամյակին նվիրված միջազգային համաժողովին, ինչպես նաև զեկույցով է հանդես եկել ԱՊՀ մասնակից պետությունների հակամենաշնորհային քաղաքականության միջպետական խորհրդի նիստին: Ներկայացվել են 2021-2022 թվականներին իրականացված և ընթացիկ ոլորտային ուսումնասիրությունները և առավել ուշագրավ վարույթները: