Մակրոնը խոստանում է Ֆրանսիան դարձնել եվրոպական արհեստական բանականության կենտրոն

Ֆրանսիայի նախագահ Էմանուել Մակրոնը հայտնել է, որ երկուշաբթի Փարիզյան գագաթնաժողովի ժամանակ Ֆրանսիան կհայտարարի արհեստական բանականության ոլորտում 109 միլիարդ եվրոյի մասնավոր ներդրումների մասին:

Սա ներառում է 20 միլիարդ եվրոն, որը կանադական Brookfield ներդրումային ընկերությունը ցանկանում է ներդնել ֆրանսիական արհեստական ​​բանականության նախագծերում, ինչպես նաև Արաբական Միացյալ Էմիրությունների ներդրումները, որոնք առաջիկա տարիներին կկազմեն մինչև 50 միլիարդ եվրո: Այս մասին Մակրոնը խոսել է կիրակի TF1 հեռուստաընկերության հետ հարցազրույցում։

Վերլուծաբանների կարծիքով՝ Եվրոպան դեռևս հետ է մնում արհեստական բանականության ​​մրցավազքում ոչ միայն ԱՄՆ-ից, այլև Չինաստանից։

Հունվարի վերջին ԱՄՆ նախագահ Դոնալդ Թրամփը հայտարարել է, որ OpenAI-ը, SoftBank Group-ը և Oracle-ը 500 միլիարդ դոլար կներդնեն Stargate-ում՝ արհեստական ​​բանականության ենթակառուցվածքում, հաջորդ չորս տարվա ընթացքում՝ օգնելու Միացյալ Նահանգներին առաջ անցնել Չինաստանից և մյուս մրցակիցներից: