Կիրակի Կոսովոյում խորհրդարանի ընտրություն է տեղի ունեցել։ Ինչպես հայտնում է Associated Press-ը՝ վկայակոչելով քվեարկության նախնական արդյունքները, ձայների 73 տոկոսի հաշվարկից հետո վարչապետ Ալբին Կուրտիի իշխող «Ինքնորոշում» կուսակցությունն առաջատարն է՝ ստանալով 42 տոկոս։
Սակայն խորհրդարանում այն չի ունենալու ձայների բացարձակ մեծամասնություն և ստիպված է լինելու ձևավորել կառավարական կոալիցիա։
Կուրտիի ալբանական ազգայնական կուսակցությունը իշխանության է եկել 2021 թվականին, սկսել է ամրապնդել Պրիշտինայի վերահսկողությունը երկրի հյուսիսային հատվածում, որտեղ բնակչության մեծամասնությունը էթնիկ սերբեր են։ Նրա կաբինետը մի շարք քայլեր է ձեռնարկել, այդ թվում տարածաշրջանում սերբական արժույթի օգտագործման արգելքը, ինչը լարվածություն է առաջացրել սերբերով բնակեցված շրջանում: Ըստ BBC-ի՝ դա նրան ժողովրդականություն է ապահովել Կոսովոյում, բայց առաջացրել է հիմնական գործընկերների՝ ԵՄ-ի և ԱՄՆ-ի զայրույթը:
Բրյուսելը դադարեցրել է որոշ նախագծերի ֆինանսավորումը և խիստ պայմաններ է ներկայացրել այն վերսկսելու համար։ Կոսովոն պետք է աշխատի հիմնականում էթնիկ սերբերով բնակեցված հյուսիսում լարվածությունը թուլացնելու ուղղությամբ:
Պրիշտինային հարվածել է նաև ԱՄՆ Միջազգային զարգացման գործակալության (USAID) միջոցով տարբեր նախագծերի ֆինանսավորման 90-օրյա դադարեցումը, քանի որ գործակալությունը կարևոր դեր է խաղում երկրում տնտեսական աճի խթանման գործում:
Պրիշտինան միակողմանիորեն անկախություն է հռչակել 2008 թ.: Այն ճանաչել է մոտ 100 երկիր, այդ թվում՝ ԱՄՆ-ն և ԵՄ շատ պետություններ։ ԵՄ հինգ երկիր՝ Իսպանիան, Կիպրոսը, Հունաստանը, Սլովակիան և Ռումինիան, չեն ճանաչել Կոսովոն։
Տարածաշրջանի անկախությունը չի ճանաչել նաև Սերբիան: