Կահիրեում ավարտված Արաբական լիգայի գագաթնաժողովում արաբ ղեկավարները Գազայի հատվածը վերականգնելու ծրագիր են ընդունել: Այն չի նախատեսում այնտեղի բնակիչների տեղահանություն: Գագաթնաժողովի եզրափակիչ կոմյունիկեն հիմնված է հատվածի վերականգնման եգիպտական ծրագրի վրա, որը նախատեսում է այդ նպատակի համար հատկացնել 53 միլիարդ դոլար։
Ավելի վաղ ԱՄՆ նախագահ Դոնալդ Թրամփը խոստացել էր Գազան վերածել «Մերձավորարևելյան Ռիվիերայի», սակայն նրա ծրագիրը ներառում էր անկլավից ավելի քան 2 միլիոն պաղեստինցիների տեղափոխումն արաբական երկրներ։
«Եգիպտական ծրագիրն այժմ համաարաբական է դարձել»,- հանդիպումից հետո ասել է Արաբական լիգայի ղեկավար Ահմեդ Աբուլ Գեյթը:
112-էջանոց նախագծի համաձայն, որին ծանոթացել են dpa և Reuters գործակալությունները, մինչև 2030 թվականը ծրագիրը նախատեսում է կառուցել հարյուր հազարավոր նոր տներ, որոնցում կբնակվի մինչև 3 միլիոն մարդ, ինչպես նաև՝ օդանավակայան, արդյունաբերական գոտիներ, հյուրանոցներ ու զբոսայգիներ:
Գագաթնաժողովի մասնակից պետությունների ղեկավարները միջազգային հանրությանն ու ֆինանսական կառույցներին կոչ են արել անհապաղ աջակցություն ցուցաբերել Գազային։ Ենթադրվում է, որ այդ հարցում առանցքային դեր կարող են ունենալ Արաբական Միացյալ Էմիրություններն ու Սաուդյան Արաբիան։