Առաջատար լրատվամիջոցները հրաժարվում են ընդունել Պենտագոնի նոր կանոնները

Անգլիալեզու առաջատար գործակալությունների, թերթերի և հեռարձակող ընկերությունների լրագրողները հրաժարվել են ստորագրել Պենտագոնի նոր կանոնները, որոնց համաձայն լրագրողը սպառնալիք կհամարվի, եթե փորձի չարտոնված, նույնիսկ ոչ գաղտնի տեղեկատվություն ստանալ:

Պաշտպանության նախարար Փիթ Հեգսեթը սեպտեմբերին հրապարակել էր նոր կանոնների նախագիծը և Պենտագոնի լրագրողներին հրահանգել մինչև հոկտեմբերի 14-ն ընդունել դրանք կամ մինչև հոկտեմբերի 15-ը հանձնել իրենց հավատարմագրերը։

Այդ կանոնները ստորագրելուց հրաժարվելու մասին հրապարակավ հայտարարել են Reuters և Associated Press գործակալությունները, ամերիկյան New York Times և Washington Post, բրիտանական Guardian թերթերը, Atlantic ամսագիրը, CNN հեռուստաընկերությունը, NPR ռադիոընկերությունը, HuffPost ինտերնետ-պարբերականը և նույնիսկ Թրամփի վարչակազմին գաղափարակից որոշ լրատվամիջոցներ, մասնավորապես՝ Washington Times-ն ու Newsmax-ը:

Լրագրողները հայտարարել են, որ նոր կանոնները համարում են մամուլի ազատության դեմ ոտնձգություն և որ իրենք կշարունակեն լուսաբանել Պենտագոնի ու ԱՄՆ զինված ուժերի գործունեությունն առանց գերատեսչության կողմից հավատարմագրման։

Ինչպես բացատրում է The Hill-ը, նոր կանոնները պաշտոնապես չեն արգելում լրագրողներին ստանալ և հրապարակել պատերազմի նախարարության մասին ոչ գաղտնի, բայց զգայուն տեղեկատվություն, սակայն նախարարությունը կարող է լրագրողներին համարել «անվտանգության սպառնալիք», եթե նրանք փորձեն նման տեղեկատվություն ստանալ Պենտագոնի աշխատակիցներից։