Վրաստանի փոխվարչապետ և պաշտպանության նախարար Իրակլի Չիքովանին գտնվում է Հայաստանի Հանրապետությունում։ Այս մասին հայտնել է Վրաստանի պաշտպանության նախարարությունը։
Գործակալության տվյալներով՝ պաշտոնական այցի շրջանակներում Իրակլի Չիքովանին հանդիպել է Հայաստանի վարչապետ Նիկոլ Փաշինյանի հետ։
«Հանդիպման ժամանակ կողմերը քննարկել են Վրաստանի և Հայաստանի միջև ավանդական բարեկամական հարաբերությունները և երկկողմ համագործակցության օրակարգում առկա արդիական հարցերը։ Ընդգծվել է երկրների միջև ռազմավարական գործընկերությունը։ Զրույցի ընթացքում անդրադարձ է եղել տարածաշրջանում խաղաղության և կայունության կարևորությանը։ Փոխվարչապետ, պաշտպանության նախարար Իրակլի Չիքովանին ևս մեկ անգամ հաստատել է վրացական կողմի պատրաստակամությունը՝ նպաստելու տարածաշրջանային համագործակցության զարգացմանը։ Նա նշել է Վաշինգտոնում Հայաստանի և Ադրբեջանի միջև ստորագրված համատեղ հռչակագրի պատմական նշանակությունը և նշել, որ համաձայնագիրը զգալիորեն կնպաստի Հարավային Կովկասում երկարաժամկետ խաղաղության և կայունության ամրապնդմանը։ Վարչապետի հետ հանդիպման ժամանակ քննարկվել է նաև երկու երկրների միջև պաշտպանության ոլորտում առկա համագործակցությունը», — ասվում է տեղեկատվության մեջ։
Պաշտպանության նախարարությունը նշում է, որ պաշտպանության նախարար Իրակլի Չիքովանին գտնվում է Հայաստանի Հանրապետությունում իր գործընկեր Սուրեն Պապիկյանի պաշտոնական հրավերով։