Ախալցխայում տեղի է ունեցել «Վարդագույն հոկտեմբեր» իրազեկման արշավի փակման միջոցառումը, որին մասնակցել են Սամցխե-Ջավախքի տարածաշրջանում պետական ներկայացուցիչ Իոսեբ Ալիբեգաշվիլին, Ախալցխայի քաղաքապետ Վարլամ Ծիկլաուրին, նրա տեղակալ Սերգի Մուշկուդիանին և սակրեբուլոյի նախագահ Սաբա Կբիլաշվիլին։
Հանդիպումը բացել է Սամցխե-Ջավախքի պետական համալսարանի ռեկտորի տեղակալ Մակա Բերիձեն։ Միջոցառման ընթացքում քննարկվել են արշավի հիմնական նպատակները, հիվանդության վաղ հայտնաբերման և ժամանակին սկրինինգային հետազոտությունների անցկացման կարևորությունը, ինչպես նաև այս ուղղությամբ նախատեսվող միջոցառումները։
Բնակչության շրջանում իրազեկվածության բարձրացման և կանխարգելիչ հետազոտությունների անհրաժեշտության մասին ելույթներով հանդես են եկել Վրաստանի խորհրդարանի պատգամավորներ Նինո Ծիլոսանին և Մարիամ Լաշխին, արդարադատության փոխնախարար Թամար Զոդելավան, Հիվանդությունների վերահսկման և հանրային առողջության ազգային կենտրոնի տնօրենի տեղակալ Էկա Ադամիան և Սամցխե-Ջավախքի կանանց կազմակերպության նախագահ Ինա Կապանաձեն։
Միջոցառման մասնակիցներն իրենց համերաշխությունն են հայտնել քաղցկեղի դեմ պայքարող մարդկանց՝ ևս մեկ անգամ ընդգծելով հիվանդության վաղ հայտնաբերման, կանխարգելիչ հետազոտությունների և հասարակության իրազեկվածության բարձրացման կարևորությունը։
«Վարդագույն հոկտեմբեր» արշավի շրջանակներում ամբողջ ամսվա ընթացքում Ախալցխայում և Սամցխե-Ջավախքի մյուս մունիցիպալիտետներում անցկացվել են տարբեր միջոցառումներ, այդ թվում՝ տեղեկատվական հանդիպումներ և անվճար սկրինինգային հետազոտություններ։
Փակման միջոցառմանը ներկա են եղել նաև սակրեբուլոյի փոխնախագահները, պետական ներկայացուցչի վարչակազմի և տեղական ինքնակառավարման մարմինների ներկայացուցիչներ, Սամցխե-Ջավախքի կանանց կազմակերպության անդամներ, բժշկական և կրթական ոլորտների ներկայացուցիչներ, ինչպես նաև հանրության անդամներ։