Միջազգային իրավապաշտպան Amnesty International կազմակերպությունը հրապարակել է տարեկան հաշվետվություն «Մարդու իրավունքների վիճակը աշխարհում»։
Վրաստանի մասին զեկույցում ասվում է, որ 2021 թվականին երկրում հարձակումներ են տեղի ունեցել ընդդիմության ներկայացուցիչների, իշխանություններին քննադատող լրատվամիջոցների և ոչ կառավարական կազմակերպությունների դեմ։ Բացահայտվել են ահաբեկման, ապօրինի գաղտնալսման փաստեր, և այս ամենն արվել է անպատժելիության մթնոլորտում։
«Դատարանների անկախության բացակայությունը, արդարադատության ընտրողականությունը և իշխանությունների հակառակորդների քաղաքական դրդապատճառներով հետապնդումները շարունակեցին անհանգստություն առաջացնել: Բողոքի ցույցերից հետո դադարեցվել է Նամախվանի հիդրոէլեկտրակայանի շինարարությունը, որի նախագիծը սուր հակասությունների տեղիք տվեց։ Աշխատանքային իրավունքների խախտումներ եղել են ամենուր՝ սրվելով կորոնավիրուսի պատճառով սահմանված սահմանափակումներով։ Աբխազիայի և Հարավային Օսիայի/Ցխինվալի տարածաշրջանի չվերահսկվող տարածքներում տեղի են ունեցել այնպիսի խախտումներ, ինչպիսիք են տեղաշարժի ազատության սահմանափակումը, ինչպես նաև խոշտանգումները և դաժան վերաբերմունքի այլ ձևերը»,- ասվում է զեկույցում։
Իրավապաշտպանները եզրակացրել են, որ անցյալ տարի երկրում շարունակվել է քաղաքական ճգնաժամը։ Մասնավորապես, նշվում է Շառլ Միշելի համաձայնագրից Վրացական երազանքի դուրս գալու մասին, որը կոչված էր նվազեցնելու հասարակության բևեռացումը։ Բացի այդ, խոսքը վերաբերում է տեղական ինքնակառավարման մարմինների ընտրություններին, որոնք ուղեկցվել են խախտումներով, Պետական տեսուչ ծառայության արտակարգ վերացումով և դատական համակարգի անկախությունը խաթարող փոփոխությունների ընդունմամբ։
«Սեպտեմբերին կառավարությունը հրաժարվեց դատավորների քաղաքականացված նշանակումների պրակտիկային դադարեցնելու մտադրությունից, և արդյունքում երկիրը կորցրեց ԵՄ-ի աջակցության վարկի կեսը՝ կապված կորոնավիրուսային պանդեմիայի հետ, որի սկզբնական գումարը կազմում էր 150 միլիոն եվրո», — ասված է զեկույցում:
Amnesty International-ի տարեկան զեկույցի առանձին կետերը վերաբերել են խոսքի ազատության, անարդար դատավարությունների, շրջակա միջավայրի դեգրադացիայի, աշխատողների իրավունքների, խոշտանգումների և վատ վերաբերմունքի այլ ձևերի խնդիրներին Աբխազիայում և Ցխինվալիի տարածաշրջանում: