Իրանի զինված ուժերի գլխավոր շտաբի պետ, գեներալ Մոհամմադ Բաղերին չորեքշաբթի այցելել է Արևմտյան Ատրպատական նահանգի Փոլդաշտ սահմանային անցակետ, որը գտնվում է Նախիջևանի սահմանին։ Այդ մասին հայտնում է IRNA գործակալությունը:
Գեներալ Բաղերին Իրանի Իսլամական Հանրապետության բանակի հրամանատարի և մի խումբ պատգամավորների ու հրամանատարների ուղեկցությամբ հանդիպել է Փոլդաշտի ղեկավարների հետ։
Իրանի զինված ուժերի գլխավոր շտաբի պետի խոսքով՝ այսօր երկրի զինված ուժերի զսպող հզորությունն առավել քան երբևէ բարձր է, և զինված ուժերի բոլոր միավորումները գտնվում են լիակատար մարտական պատրաստության վիճակում:
Նա այս այցի հիմնական նպատակն անվանել է Ադրբեջանի հետ Իրանի սահմանի պասիվ պաշտպանության դիտարկումը։