Freedom House-ը Ռուսաստանում հայտարարվել է «անցանկալի կազմակերպություն»

Ռուսաստանն «անցանկալի կազմակերպություն» է հայտարարել ամերիկյան Freedom House ՀԿ-ին, որն ուսումնասիրում է աշխարհում քաղաքական և քաղաքացիական ազատությունների վիճակը։ Ռուսաստանի գլխավոր դատախազությունը կազմակերպությանը մեղադրել է «աշխարհում Միացյալ Նահանգների գերիշխող դերի հաստատմանն աջակցելու» համար։ Բացի այդ, ըստ ռուսական գերատեսչության, Freedom House-ը մասնակցել է «ռուս-ուկրաինական հակամարտության հարցում ոչ բարեկամական պետությունների քաղաքականության խթանմանը» և, ի թիվս այլ բաների, «վարկաբեկել» է ռուսական բանակը։
Հայտարարության մեջ նաև նշվում է, որ ՀԿ-ն ակտիվորեն կոչ է անում աջակցել Ուկրաինային, բռնագրավել ռուսական սառեցված ակտիվները, ուժեղացնել պատժամիջոցային ճնշումը Ռուսաստանի Դաշնության վրա և պատժամիջոցներ կիրառել Ռուսաստանին աջակցող երրորդ երկրների նկատմամբ։ Բացի այդ, Freedom House-ը «տեղեկատվական, ֆինանսական և իրավական աջակցություն է տրամադրում» ռուսաստանյան ընդդիմությանը, «արևմտամետ ակտիվիստներին», ինչպես նաև «ահաբեկչական հանցագործություններ կատարելու համար դատապարտված անձանց»։
«Անցանկալի կազմակերպությունների» կարգավիճակը Ռուսաստանի օրենսդրության մեջ օրինականորեն գործում է 2015 թվականից: Ներկայումս «անցանկալիների» ցուցակում կա 160 կազմակերպություն, որոնց մեծ մասը հիմնված է Մեծ Բրիտանիայում, Գերմանիայում, ԱՄՆ-ում և Ուկրաինայում։