Ուկրաինայում հակամարտությունը կձգձգվի, իսկ ռուսական կողմի գործողությունների ագրեսիվությունը կաճի։ Այդ մասին հայտարարել է Եվրամիության արտաքին քաղաքականության և անվտանգության քաղաքականության գերագույն ներկայացուցիչ Ժոզեպ Բորելը՝ փոխանցում է ՏԱՍՍ-ը։
Եվրոպական դիվանագիտության ղեկավարը հորդորել է շարունակել Ուկրաինային տրամադրել պայքարի միջոցներ, Ռուսաստանի վրա էլ տնտեսական ճնշում գործադրել։ Նա նշել է, որ ռուսական տնտեսությունն «արդեն սկսում է կաղալ», և դա Կիևին ավելի լավ դիրք կապահովի ապագա խաղաղ բանակցություններում։
Բորելը վստահեցրել է, որ Ռուսաստանի դեմ պատժամիջոցների վեցերորդ փաթեթի շուրջ կհաջողվի համաձայնություն ձեռք բերել։ Նա մատնանշել է, որ Հունգարիային, Սլովակիային և Չեխիային, որոնց բաժին է ընկնում ԵՄ-ի ռուսական նավթի և նավթամթերքի ներմուծումների յոթից ութ տոկոսը, ժամանակ կտրվի ռուսական էներգետիկ ռեսուրսներից կախվածությունից ազատվելու համար:
Եվրախորհրդարանի առաջատար խմբակցության՝ Եվրոպական ժողովրդական կուսակցության (ԵԺԿ) ղեկավար Մանֆրեդ Վեբերն էլ կոչ է արել ԵՄ-ին չհրաժարվել Ռուսաստանից նավթի ներմուծման էմբարգո սահմանելուց՝ Բուդապեշտի տատանվող դիրքորոշման պատճառով։ Նա դեմ է արտահայտվել փոխզիջումներին՝ հօգուտ Հունգարիայի։