Վրաստանի նախագահ Սալոմե Զուրաբիշվիլին կարծում է, որ ներկայիս ագրեսիայի համատեքստում Ռուսաստանի հետ առանց վիզայի ռեժիմը կարող է «վերանայվել»։
Այս մասին Սալոմե Զուրաբիշվիլին հայտարարել է Մոլդովայի նախագահ Մայա Սանդուի հետ հանդիպումից հետո կայացած մամուլի ասուլիսում։ Երկու երկրների նախագահներին հարցրել են, թե հայտարարված մոբիլիզացիայի հետ կապված՝ Ռուսաստանի քաղաքացիների արտահոսքը Վրաստան և Մոլդովա վտանգ չի ներկայացնում այդ երկրների համար։
«Ռուսաստանի քաղաքացիների մուտքը Վրաստան իսկապես մարտահրավեր է։ Չէի ասի, որ դա սպառնալիք է, բայց մարտահրավեր է: Նրանց թվում կան Վրաստանի նախկին քաղաքացիներ, սակայն կան նաև Ռուսաստանի քաղաքացիներ, ովքեր Վրաստան են եկել տարբեր պատճառներով։ Այստեղ գլխավորն այն է, որ հասարակությունը վստահ լինի, որ բոլոր վերահսկողական մեխանիզմները կիրառվում են, որպեսզի վտանգ չլինի։
Դրա համար, կարծում եմ, պետք է ավելի շատ շփում, ավելի շատ հանրային իրազեկում, որ բոլոր հնարավոր սպառնալիքներն ու խնդիրները իսկապես հաշվի են առնվում պետության կողմից։
Հնարավոր է, որ մենք ստիպված լինենք վերանայել վիզային ռեժիմը, որն այսօրվա պայմաններում բավականին ազատական է և կարող է ավելի քիչ ընդունելի լինել այս ագրեսիայի պայմաններում, բայց դա պետք է որոշի կառավարությունը հանրության հետ միասին և տեղեկացնելով նրանց», — ասել է Սալոմե Զուրաբիշվիլին:
Մայա Սանդուն, իր հերթին, նշել է, որ պատերազմի ֆոնին անվտանգության ռիսկերը մեծացել են, և պատկան մարմիններն անում են ամեն ինչ, որպեսզի օգտագործեն անհրաժեշտ զտիչներ, որպեսզի նրանք, ովքեր ցանկանում են ապակայունացնել իրավիճակը, չկարողանան մուտք գործել Մոլդովա։
«Ամեն ինչ վերահսկվում է, և այս առումով մեծ խնդիրներ չկան։ Մենք պետք է շարունակենք վերահսկել և գործել ըստ անհրաժեշտության»,- հավելել է Մայա Սանդուն: