Մեծ Բրիտանիայի արտաքին քաղաքական գերատեսչության ղեկավար Ջեյմս Քլևերլին պաշտոնական այցով ժամանել է Աստանա: Նրան ընդունել է Ղազախստանի նախագահ Կասիմ Ժոմարտ-Տոկաևը, որը Բրիտանիայի վարչապետ Ռիշի Սունակին հրավիրել է այցելել հանրապետություն:
Ղազախստանի նախագահի մամուլի ծառայությունից հայտնել են, որ հանդիպման ընթացքում կողմերը քննարկել են քաղաքական, առևտրատնտեսական, ներդրումային և հումանիտար ոլորտներում համագործակցության հետագա ամրապնդման հեռանկարները:
Տոկաևն ու Քլևերլին ընդգծել են երկկողմ հարաբերությունների զարգացման դրական դինամիկան։ Մեծ Բրիտանիայի ԱԳ նախարարի խոսքով՝ Լոնդոնը դրական է գնահատում Ղազախստանում ընթացող քաղաքական բարեփոխումները:
Բրիտանացի դիվանագետին ընդունել է նաև Ղազախստանի վարչապետ Ալիխան Սմաիլովը: «Ղազախստանի կառավարությունը տրամադրված է բոլոր ուղղություններով Մեծ Բրիտանիայի հետ փոխգործակցության հետագա խորացմանը։ Այս համատեքստում կարևոր քայլ կլինի ռազմավարական գործընկերության և համագործակցության մասին համաձայնագրի ստորագրումը, որի մշակումն ավարտական փուլում է»,- ասել է Սմաիլովը:
Իր հերթին Քլևերլին ընդգծել է, որ Ղազախստանը Կենտրոնական Ասիայում Մեծ Բրիտանիայի կարևորագույն առևտրային գործընկերներից մեկն է: