Չինաստանի նախագահ Սի Ծինփինը պետական այցով ժամանել է Մոսկվա, հաղորդում է ՌԻԱ Նովոստին: Սա Չինաստանի ղեկավարի առաջին միջազգային այցն է երրորդ ժամկետով վերընտրվելուց հետո, այն կտևի մարտի 20-22-ը։
Պեկինն ակնկալում է, որ այցը կամրապնդի երկու երկրի միջև փոխվստահությունը։ Չինաստանի ԱԳՆ պաշտոնական ներկայացուցչի խոսքով՝ այն նոր լիցք կհաղորդի երկկողմ հարաբերությունների զարգացմանը։
Ղեկավարները կքննարկեն Ռուսաստանի և Չինաստանի միջև գործընկերության և փոխգործակցության հետագա զարգացման հարցեր, կստորագրվեն երկկողմ կարևոր փաստաթղթեր։
Ռուսաստանի նախագահ Վլադիմիր Պուտինի և Չինաստանի նախագահ Սի Ծինփինի հանդիպումը կսկսվի Մոսկվայում՝ մարտի 20-ի կեսօրին, ասել է ՌԴ նախագահի մամուլի քարտուղար Դմիտրի Պեսկովը։ Նա չի բացառել, որ կողմերը Մոսկվայում կայանալիք բանակցություններում կքննարկեն Ուկրաինայի հակամարտությունը և խաղաղության չինական ծրագիրը։