Եվրամիության արտաքին գործերի նախարարները մտահոգություն են հայտնել Վրաստանում «Օտարերկրյա ազդեցության թափանցիկության մասին» օրենքի առնչությամբ։
Այս մասին Եվրամիության արտաքին գործերի նախարարների հանդիպումից հետո հրավիրված մամուլի ասուլիսում հայտարարեց Եվրամիության արտաքին գործերի և անվտանգության քաղաքականության գերագույն ներկայացուցիչ Ջոզեֆ Բորելը։
Ջոզեֆ Բորելը կրկնել է, որ այս օրենքը անհամատեղելի է Եվրամիության արժեքների հետ։ Բացի այդ, ըստ նրա, Եվրահանձնաժողովը պետք է զեկույց ներկայացնի նշված իրադարձությունների զարգացման վերաբերյալ։
«Վերոնշյալ օրենքը ներկայացվել է խորհրդարան, և Վրաստանի կառավարությունը պարտավորվել է հետ կանչել այս օրենքի նախագիծը և այլևս չներկայացնել։ Սա չարվեց։ Հանձնակատար Վարհեյը և ես անցյալ շաբաթ հայտարարություն տարածեցինք՝ շեշտելով, որ այս օրենքը անհամատեղելի է ԵՄ արժեքների հետ։ Կրկնում եմ՝ այս օրենքը անհամատեղելի է Եվրամիության արժեքների հետ։ Եվրահանձնաժողովը պետք է զեկույց ներկայացնի նշված իրադարձությունների զարգացման վերաբերյալ։ Մեզ անհանգստացնում է այն փաստը, որ այս օրենքը ի սկզբանե ներկայացվել է խորհրդարան»,- ասել է Ջոզեֆ Բորելը։