Ուկրաինան չի տարանցել ռուսական գազը 2024 թվականի դեկտեմբերի 31-ից հետո, նույնիսկ եթե այն նախապես գնած լինի երրորդ կամ ուղղակիորեն ԵՄ սպառող երկիրը։ Այդ մասին Վոլոդիմիր Զելենսկին հայտարարել է Բրյուսելում տեղի ունեցած մամուլի ասուլիսում։
«Մենք չենք ուզում խաղեր խաղալ. եթե մի երկիր, որը գազ է ստանում Ռուսաստանից, հետո իր գազն է ուղարկում, ապա դա նույնն է, ինչ փողն ուղարկես Ռուսաստան: Եթե եվրոպական երկիրը պատրաստ է գազ ստանալ և չվճարել այդ գումարները Ռուսաստանին մինչև հակամարտության ավարտը, ապա կարելի է մտածել այդ տարբերակի մասին»,- ասել է Ուկրաինայի նախագահը և հավելել, որ այդ հարցը Բրյուսելում քննարկել է ռուսական գազ ստացող Սլովակիայի վարչապետ Ռոբերտ Ֆիցոյի հետ ու հայտնել իր դիրքորոշումը։
Ուկրաինայի տարածքով ռուսական գազի տարանցման պայմանագրի ժամկետը լրանում է 2024 թվականի դեկտեմբերի 31-ին։ Կիևը բազմիցս հայտնել է, որ մտադիր չէ այն երկարաձգել։ Սակայն ուկրաինական և արևմտյան մի շարք լրատվամիջոցներ գրել են, որ հնարավոր են տարանցման սխեմաներ, որոնց դեպքում եվրոպական երկրները գազ կգնեն ՌԴ-ից՝ մինչև այն սպառողին ուղարկելը, այնպես որ Ուկրաինայի տարածքով արդեն ռուսական գազ չի անցնի։ Ենթադրություններ կան նաև, որ ՌԴ-ից գազը կարող է գնել երրորդ երկիրը, օրինակ՝ Ադրբեջանը, որպեսզի այնուհետև այն Եվրոպա մատակարարի Ուկրաինայի տարածքով։