Ադրբեջանն ու Հայաստանը առաջընթաց են գրանցել սահմանների սահմանազատման և սահմանագծման հարցում, ինչը նպաստում է կայունությանը։ Այդ մասին լրագրողներին հայտնել է ՌԴ փոխվարչապետ Ալեքսեյ Օվերչուկը։
Հարցին, թե իր՝ ադրբեջանցի և հայ գործընկերներ Շահին Մուստաֆաևի և Մհեր Գրիգորյանի հետ համանախագահած եռակողմ աշխատանքային խումբը շարունակում է արդյոք աշխատել, Օվերչուկը նշել է. «Մենք պարբերաբար շփվում ենք այդ թեմայով, բայց ոչ եռակողմ ձևաչափով: Իմ գործընկերները պարբերաբար հանդիպում են սահմանների սահմանազատման և սահմանագծման հանձնաժողովների շրջանակներում։ Այնտեղ շատ մեծ և լավ առաջընթաց է գրանցվել»։
Օվերչուկն ընդգծել է, որ սահմանի մի հատվածն արդեն սահմանազատվել և սահմանագծվել է, այժմ կողմերը պայմանավորվել են համապատասխան հարցում շարժվել հյուսիսից հարավ՝ սկսած Ադրբեջանի, Հայաստանի և Վրաստանի սահմանների հանգույցից:
«Մենք միշտ ողջունել ենք նման շփումները և համատեղ աշխատանքը, քանի որ այն, անկասկած, կնպաստի կայունությանը տարածաշրջանում, և միշտ առաջարկել ենք մեր աջակցությունն այս գործընթացին»,- հավելել է ՌԴ փոխվարչապետը։