Բաքվի Սաբունչու շրջանում 15 մարդու մահ է գրանցվել էթիլ սպիրտից թունավորման պատճառով։ Այս մասին հայտնել են Ադրբեջանի գլխավոր դատախազությունից՝ պարզաբանելով, որ մահվան ելքով թունավորման դեպքերը տեղի են ունեցել փետրվարի 22-23-ը։
Փաստի առթիվ հարուցվել է քրեական գործ, կատարվում է նախաքննություն։
Դատախազության աշխատակիցները, քրեագետներն ու դատաբժշկական փորձագետներն արդեն զննել են դեպքի վայրը և զոհերի մարմինները, առգրավել են իրեղեն ապացույցներ, այդ թվում՝ 75% և 95% սպիրտ պարունակող հիգիենիկ միջոցների դատարկ շշեր, ինչպես նաև սննդի մնացորդներ։
Բաքվի կլինիկական բժշկական կենտրոնի թունաբանության բաժանմունքի ղեկավարը հիշեցրել է, որ տեխնիկական սպիրտից թունավորումներ գրանցվել են մի քանի տարի առաջ և զգուշացրել, որ տեխնիկական սպիրտը կարող է ազդել օրգանիզմի վրա նույնիսկ 30-50 մլ օգտագործման դեպքում: