Եվրամիությունը կոչ է արել Վրաստանում բոլոր կողմերին զերծ մնալ բռնությունից, ասվում է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասի և ԵՄ ընդլայնման հարցերով եվրահանձնակատար Մարթա Կոսի համատեղ հայտարարության մեջ։
«Մենք կոչ ենք անում հանգստություն և զսպվածություն դրսևորել հետընտրական շրջանում և կոչ ենք անում կառավարությանը հարգել քաղաքացիների հավաքների և խոսքի ազատության իրավունքը։ Անհրաժեշտ է կառուցողական ու համընդգրկուն երկխոսություն բոլոր քաղաքական ուժերի մասնակցությամբ, ու մենք կոչ ենք անում բոլոր կողմերին զերծ մնալ բռնությունից»,- ասվում է հայտարարության մեջ։
Դիվանագետները նշում են, որ ԵՄ-ն վճռականորեն մերժում և դատապարտում է «Վրաստանում Եվրամիության դերի մասին ապատեղեկատվությունը», ինչպես նաև դատապարտում է ԵՄ դեսպանի վրա անձնական հարձակումները։
«Անկախ լրատվամիջոցների վրա հարձակումները, քաղաքացիական հասարակության դեմ օրենքների ընդունումը, ընդդիմադիրների և ակտիվիստների ձերբակալությունները, ինչպես նաև իշխող կուսակցության օգտին ընտրական օրենսգրքի փոփոխությունները կտրուկ կրճատել են մրցակցային ընտրություններ անցկացնելու հնարավորությունը»,- ասված է հայտարարության մեջ։
Ավելի վաղ Վրաստանի ներքին գործերի նախարարությունը
հայտնել է ընդդիմադիր 5 գործչի ձերբակալության մասին, որոնք մեղադրվում են պետական հեղաշրջման ու իշխանության տապալման կոչերի համար: Նախարարության տվյալով՝ ձերբակալվածներն են Պաատա Բուրչուլաձեն, Մուրթազ Զոդելավան, Իրակլի Նադիրաձեն, Պաատա Մանջգալաձեն և Լաշա Բերիձեն: Վրաստանի ՆԳՆ-ի հաղորագրության մեջ նշվում է, որ նրանց կարող է սպառնալ մինչև 9 տարվա ազատազրկում:
Հիշեցնենք՝ Թբիլիսիում ընդդիմադիրների հանրահավաքը սկսվել էր շաբաթ երեկոյան՝ Վրաստանում անցկացված տեղական ինքնակառավարման մարմինների, այդ թվում՝ Թբիլիսիի քաղաքապետի ընտրության օրը:
Ընտրապայքարին մասնակցել է 12 կուսակցություն` 7 հազարից ավելի թեկնածուով: Ընդդիմադիր 8 կուսակցություն բոյկոտել է ընտրությունը:
Սկզբում ցուցարարները հավաքվել են Ազատության հրապարակում, ապա նրանց որոշ մասը շարժվել է դեպի երկրի նախագահ Միխեիլ Կավելաշվիլու նստավայր:
Իրավապահները Վրաստանի նախագահի նստավայր ներխուժած ակցիայի մասնակիցների դեմ
կիրառել են ջրցան մեքենաներ և արցունքաբեր գազ:
Երկրի պետական անվտանգության ծառայությունը
հայտարարել է, որ Վրաստանում առգրավվել են հոկտեմբերի 4-ի դիվերսիայի համար նախատեսված մեծ քանակությամբ զենք և պայթուցիկ նյութեր:
Վրաստանի առողջապահության նախարարությունը շաբաթ օրը հայտնել էր՝ բողոքի ակցիաների 6 մասնակից և իրավապահ մարմինների 21 աշխատակից է տուժել անկարգությունների հետևանքով:
