Ախալքալաքի մունիցիպալիտետի փոխքաղաքապետ Թեյմուրազ Մճեդլիձեն, քաղաքապետարանի ենթակառուցվածքների ծառայության պետ Արա Մովսիսյանը և վերահսկողության ծառայության պետ Արթուր Դավթյանը Խանդո գյուղում ծանոթացել են նոր մարզադահլիճի շինարարական աշխատանքների ընթացքին։
Նախագիծն ուղղված է մունիցիպալիտետում առողջ ապրելակերպի խթանմանը, սպորտի զարգացմանը և հատկապես երիտասարդների համար մարզվելու համապատասխան պայմանների ստեղծմանը։
Կառուցվող շենքը ներառում է ժամանակակից չափանիշներին համապատասխան մարզադահլիճ և անհրաժեշտ այլ տարածքներ։ Նախագծի կարևոր առանձնահատկություններից է նաև դրա ամբողջական հարմարեցումը հաշմանդամություն ունեցող անձանց կարիքներին՝ ապահովելով հասանելի և ներառական միջավայր։
Մարզադահլիճի կառուցման ծրագիրը մշակվել է՝ հաշվի առնելով տեղի բնակչության, հատկապես երիտասարդների կարիքներն ու հետաքրքրությունները։ Նոր մարզական տարածքը հնարավորություն կտա բնակիչներին զբաղվել սպորտով ավելի հարմարավետ և համապատասխան պայմաններում։
Նախագծի ընդհանուր արժեքը կազմում է 271 598 լարի։ Շինարարական աշխատանքներն ամբողջությամբ ֆինանսավորվում են Ախալքալաքի մունիցիպալիտետի տեղական բյուջեից։