Լեռնային Ղարաբաղի մի խումբ ակտիվիստներ երեկվանից փակել են Ռուսաստանի խաղաղապահների՝ Իվանյանում գտնվող տեղակայման վայրի մուտքը։
Լաչինի միջանցքի ապաշրջափակման շարժման նախաձեռնող խմբի անդամ Արթուր Օսիպյանը համացանցում ուղիղ հեռարձակմամբ ներկայացրել է ակցիայի մանրամասները, նշել՝ իրենց պահանջն է, որ խաղաղապահները կատարեն պարտավորությունները:
«Լուրերի» հետ հեռախոսազրույցի ժամանակ Արթուր Օսիպյանը ներկայացրել է ռուս խաղաղապահների հետ տեղի ունեցած միջադեպի մանրամասները:
«Ճնշում էին գործադրում, որ հեսա այ БТР-ով (զրահափոխադրիչ – խմբ.) անցնում ենք ձեր ավտոյի վրայով: Նստել եմ ավտոն, ասել եմ՝ անցե՛ք: Հիմա էլ БТР-ը քշում են, որ ավտոյի հետևին խփեն: Մի «Ուրալ»-ով էլ քշում էին, որ ավտոյի էն բանին խփեն: Մուտքն արդեն բացել են:
Երկրորդ անգամ են ծանր տեխնիկա հանել: Մեր ավտոն շատ թեթև էր: Այնքան բազմամարդ չէինք, որպեսզի կարողանայինք դիմադրել:
Նպատակը ապաշրջափակումն է, բայց մենք միջանկյալ խնդիրներ ենք դնում՝ ոնց այդ ապաշրջափակմանը հասնել: Ուզում ենք հասնել Հակարիի կամուրջ և Հակարիի կամրջում բարձրացնել մեր ձայնը, բարձրացնել մեր պահանջները»,- ասաց նա:
Հիշեցնենք, որ մարդատար մեքենայով փակված մուտքը բացելու համար այսօր ռուսական խաղաղապահ ուժերը ծանր տեխնիկա են դուրս հանել: Ապա խաղաղապահներն ուժով հրել են մեքենան՝ մուտքը բացելու համար: Արթուր Օսիպյանը բոլորին կոչ է արել ժամը 19:00-ին հավաքվել Ստեփանակերտի Վերածննդի հրապարակում։