Վրաստանի և Հայաստանի խորհրդարանների բարեկամության խմբի անդամներն այցելել են Վարձիայի վանական համալիր։ Այս մասին տեղեկություն է տարածում խորհրդարանի մամուլի գրասենյակը։
Երկու երկրների օրենսդիր մարմինների անդամները տեղեկություններ են լսել պատմական հուշարձանի մասին և այցելել Վերափոխման տաճար, վանականների և միանձնուհիների խցեր, սեղանատուն և գինու մառան վանական համալիրում։
Հայաստանի Հանրապետության խորհրդարանի հետ բարեկամության խմբի ղեկավար Գիորգի Վոլսկին ամփոփեց երկու օրերի ընթացքում քննարկված հարցերն ու դրանց նշանակությունը։
«Հայաստանի Հանրապետության խորհրդարանի հետ բարեկամության խումբը գոյություն ունի վաղուց և ունի փոխհարաբերությունների լավ ավանդույթ։ Երկու օրվա ընթացքում հետաքրքիր և գործնական հանդիպումներ ունեցանք Ախալքալաքում և Ախալցխայում, իսկ այսօր այցելեցինք Վարձիայի վանական համալիր։ Քննարկեցինք հետաքրքիր թեմաներ, դրանց թվում խոսեցինք մշակութային ժառանգության և այն խնդիրների մասին, որոնք պատմականորեն միավորում ու մերձեցնում են մեր երկրներն ու ժողովուրդներին»,- ասաց Վրաստանի խորհրդարանի առաջին փոխխոսնակը։ Բարեկամության խմբի անդամ, պաշտպանության և անվտանգության կոմիտեի նախագահի առաջին տեղակալ Թենգիզ Շարմանաշվիլին ասաց, որ բարեկամության խմբերի երկկողմ այցերը համագործակցության լավ ձև են։
«Հարկ է նշել, որ խորհրդարանական պատվիրակությունները ներկայացված են բարձր մակարդակով, իսկ բարեկամության խմբերը մշտապես ղեկավարում է խորհրդարանի փոխնախագահը։ Այցի ընթացքում տեղի ունեցան հետաքրքիր հանդիպումներ, հայ գործընկերներից շատ նորություններ լսեցինք իրենց երկրում ընթացող գործընթացների մասին, մտքեր փոխանակեցինք միջազգային իրադարձությունների մասին։ Խոսել ենք նաև մշակութային և տնտեսական համագործակցության ուղղությունների մասին»,- ասաց Թենգիզ Շարմանաշվիլին։ Գիորգի Վոլսկին Սամցխե-Ջավախքի տարածաշրջանում երկու օրով հյուրընկալել է իր հայ գործընկեր, ՀՀ Ազգային ժողովի փոխնախագահ, Հայաստան-Վրաստան խորհրդարանական բարեկամության խմբի ղեկավար Ռուբեն Ռուբինյանին։