Գերմանիայի Սաքսոնիա դաշնային երկրամասի վարչական կենտրոն Դրեզդենում սեպտեմբերի 11-ի գիշերը Կարոլա կամրջի մի մեծ հատված փլուզվել է: Էլբա գետի մեջ է ընկել կամրջի՝ հարյուր մետր երկարությամբ հատվածը, որի երկայնքով տրամվայի գծեր են անցել։
Տեղական թերթերը, հղում անելով փրկարար ծառայություններին, հայտնել են, որ կամրջի մասնակի փլուզումը տեղի է ունեցել գիշերը՝ մոտ ժամը երեքին, դեռևս չպարզված պատճառներով։
Վթարի հետևանքով վնասվել է ջերմամատակարարման երկու խոշոր գիծ, ինչը բացասաբար է ազդել ամբողջ քաղաքի ջեռուցման վիճակի վրա։ Փրկարար ծառայությունների տվյալներով՝ խափանվել է Դրեզդենի ջեռուցման ամբողջ համակարգը, իսկ տաք ջրի հոսքերն ամբողջությամբ հեղեղել են ափի մի մասը։
Կամրջի փլուզման հետևանքով ոչ ոք չի տուժել։ Կարոլա կամրջի բոլոր մուտքերն առայժմ փակ են։