ԱՄՆ նախագահ Դոնալդ Թրամփի վարչակազմը պլանավորում է նախագահի պաշտոնավարման առաջին տարում երկրից արտաքսել մինչև մեկ միլիոն անօրինական ներգաղթյալի, The Washington Post-ին հայտնել է դաշնային չորս ներկա և նախկին պաշտոնյա։
Նրանց խոսքով՝ այս թիվը զգալիորեն գերազանցում է տեղահանությունների նախորդ ռեկորդը Բարաք Օբամայի նախագահության ժամանակաշրջանում (2009-2017)՝ տարեկան 400 հազար մարդ։
Պարբերականը նշել է, որ վերլուծաբաններն այդ թիվն անիրատեսական են համարում, քանի որ առաջադրանքի համար բավարար ֆինանսավորում և իրավապահ մարմիններ չեն հատկացվել։ Բացի այդ, թերթը նշում է, որ միգրանտների մեծ մասն իրավունք ունի դատական կարգով բողոքարկել արտաքսումը։
Ըստ պարբերականի՝ դժվար է հետևել, թե քանի մարդ է Թրամփի վարչակազմն արդեն արտաքսել երկրից, քանի որ պաշտոնյաները դադարեցրել են ամսական վիճակագրության հրապարակումը։ Ներքին անվտանգության նախարարության տվյալներով՝ 2025 թվականի սկզբից ԱՄՆ-ից արտաքսվել է 117 հազար մարդ։