Լիբանանի նախագահ գեներալ Ժոզեֆ Աունը զգուշացրել է պաղեստինյան արմատական ՀԱՄԱՍ շարժմանը՝ չիրականացնել տարածաշրջանում իրավիճակը ապակայունացնելուն ուղղված գործողություններ։
«Լիբանանը չպետք է ծառայի որպես տարածաշրջանում կայունությունը խաթարելու հարթակ: Իշխանությունները չեն հանդուրժի այն գործողությունները, որոնք երկիրը ներքաշում են պատերազմների մեջ»,- հայտարարել է նախագահը:
Երկրի Գերագույն պաշտպանության խորհուրդը պահանջել է պատասխանատվության ենթարկել Լիբանանի տարածքից հրթիռներ արձակելու մեջ ներգրավված բոլոր անձանց և վերահաստատել է իշխանությունների պահանջը՝ բոլոր խմբավորումները պետք է հանձնեն իրենց անօրինական զենքերը։
Ապրիլին Լիբանանի անվտանգության ծառայությունները ձերբակալել էին 13 հոգուց բաղկացած խմբի՝ մարտի 22-ին և 28-ին Իսրայելի Մեթուլա և Կիրյաթ Շմոնա քաղաքների վրա հրթիռներ արձակելու համար:
Լիբանանյան բանակն էլ Արկուբ սահմանամերձ շրջանում ոչնչացրել է «Քուվվաթ Ալ Ֆաջր» կազմավորման բազան, որը «Ալ Ջամաա ալ Իսլամիա» սուննի կազմակերպության զինված թևն է: