Ախալքալաքում Առողջապահության նախարարության Հիվանդությունների վերահսկման և հանրային առողջության ազգային կենտրոնի կողմից տեղի բնակչության համար կազմակերպվել է անվճար սկրինինգային արշավ: Նախաձեռնության նպատակն է վաղ հայտնաբերել տարբեր հիվանդություններ, հոգ տանել բնակչության առողջության մասին և ուժեղացնել կանխարգելիչ միջոցառումները:
Զննումները անցկացվել են տեղում՝ ժամանակակից մեթոդներով և որակավորված բժշկական անձնակազմի կողմից:
Սկրինինգի հիմնական ոլորտներն էին արգանդի վզիկի և կրծքագեղձի քաղցկեղի սկրինինգը, ոչ վարակիչ հիվանդությունների կանխարգելիչ հետազոտությունները, արյան ճնշման, արյան մեջ գլյուկոզի և խոլեստերինի մակարդակի վերահսկումը, սրտանոթային ռիսկի գնահատումը, ինչպես նաև վարակիչ հիվանդությունների (հեպատիտ B և C, ՄԻԱՎ վարակ) հայտնաբերումը:
Սկրինինգը առողջության պաշտպանության ամենաարդյունավետ միջոցներից մեկն է, որը հայտնաբերում է հիվանդությունները վաղ փուլում, երբ բուժումը հատկապես արդյունավետ է:
Սկրինինգի արդյունքում հայտնաբերված հիվանդությունների ախտորոշումը և բուժումը ֆինանսավորվում են տարբեր պետական ծրագրերի կողմից: Քաղցկեղի վաղ հայտնաբերման և կառավարման ազգային ծրագրերը ֆինանսավորում են ինչպես հետազոտությունները, այնպես էլ բուժումը: Ոչ վարակիչ հիվանդությունների վերահսկողությունը հասանելի է առաջնային առողջապահության մակարդակում, մինչդեռ վարակիչ հիվանդությունների (B և C հեպատիտներ և ՄԻԱՎ վարակ) ախտորոշումը և բուժումը լիովին կամ մասնակիորեն ֆինանսավորվում են պետական ծրագրերով, ինչը ապահովում է բնակչության լայն հասանելիությունը անհրաժեշտ ծառայություններին։
Ակցիան անցկացվել է Ախալքալաքի մունիցիպալիտետի հանրային առողջության կենտրոնների և տեղական ինքնակառավարման մարմինների աջակցությամբ։
Ախալքալաքում բժշկական խորհրդատվությունների գործընթացին տեղում ծանոթացել են Ախալքալաքի մունիցիպալիտետի քաղաքապետի առաջին տեղակալ Թեյմուրազ Մչեդլիձեն, Սակրեբուլոյի նախագահ Ռուբեն Պալյանը, քաղաքապետարանի սոցիալական բաժնի ղեկավար Անաիդա Յորդանյանը՝ իրենց աշխատակիցների հետ միասին։ Տեղական ինքնակառավարման մարմինների ներկայացուցիչները նշել են, որ առողջապահական ծրագրերի միջոցով բնակչությանը աջակցելը կարևոր առաջնահերթություն է Ախալքալաքի քաղաքապետարանի համար։
Նմանատիպ բժշկական արշավներ պարբերաբար անցկացվում են մունիցիպալիտետում և կշարունակվեն նաև ապագայում։