Ախալցխայի քաղաքապետարանը շարունակում է համայնքում գրանցված բազմազավակ ընտանիքների սոցիալական աջակցության ծրագիրը՝ նրանց համար նախատեսելով միանվագ ֆինանսական օգնություն։
Ընթացիկ տարվա հունվար-հուլիս ամիսներին ծրագրից օգտվել է 53 բազմազավակ ընտանիք, որոնց ընդհանուր առմամբ տրամադրվել է 28 000 լարի դրամական օգնություն։
Միանվագ սոցիալական օգնությունից կարող են օգտվել Ախալցխայի մունիցիպալիտետում գրանցված այն բազմազավակ ընտանիքները, որոնց սոցիալական վարկանիշային միավորը կազմում է 0-ից մինչև 200 000 ներառյալ, և ընտանիքում կա 0-ից 18 տարեկան 4 կամ ավելի անչափահաս երեխա։
Չորս երեխա ունեցող ընտանիքի համար միանվագ սոցիալական օգնության չափը կազմում է 500 լարի։ Յուրաքանչյուր հաջորդ երեխայի առկայության դեպքում օգնության չափն ավելանում է 100 լարիով։
Ծրագրի նպատակն է աջակցել բազմազավակ ընտանիքներին, թեթևացնել նրանց սոցիալական բեռը և նպաստել երեխաների բարեկեցության ապահովմանը։