Ախալցխայի քաղաքապետարանը շարունակում է իրականացնել առողջապահական մի շարք ենթածրագրեր, որոնց շրջանակում քաղաքացիներին ֆինանսական աջակցություն է տրամադրվում տարբեր բժշկական ծառայությունների և անհրաժեշտ դեղորայքի ձեռքբերման համար։
Ծրագրերի հիմնական նպատակն է ապահովել քաղաքացիների համար բժշկական օգնության ժամանակին և արդյունավետ հասանելիությունը։
Ընթացիկ տարվա հունվար-հուլիս ամիսներին քաղաքապետարանի կողմից իրականացվող առողջապահական ծրագրերից օգտվել է շուրջ 1500 քաղաքացի։ Ծրագրերի ֆինանսավորման համար տեղական բյուջեից այս ժամանակահատվածում հատկացվել է 756 հազար լարի։
Առողջապահական ենթածրագրերի շրջանակում ֆինանսավորվում են՝
- բժշկա-ախտորոշիչ հետազոտություններ,
- պլանային և անհետաձգելի վիրաբուժական ծառայություններ,
- ուռուցքաբանական հիվանդություններ ունեցող շահառուների բուժում,
- ստացիոնար բուժում,
- դեղորայքի ձեռքբերում, այդ թվում՝ քրոնիկ հիվանդություններ ունեցող անձանց համար,
- հատուկ կարիքներ ունեցող երեխաների աջակցություն։
Քաղաքապետարանի կողմից իրականացվող ծրագրերը նպատակ ունեն նվազեցնել քաղաքացիների բժշկական ծախսերի ֆինանսական բեռը և նպաստել անհրաժեշտ բուժօգնության հասանելիության բարձրացմանը։