«2024 թվականին Ադրբեջանի նկատմամբ պատժամիջոցների ակտ» օրինագիծը, որը ենթադրում է պատժամիջոցներ 44 ադրբեջանցի բարձրաստիճան պաշտոնյաների նկատմամբ՝ 44-օրյա պատերազմում նրանց դերի և մարդու իրավունքների խախտումների համար, մեկ ամիս առաջ ԱՄՆ Կոնգրեսում ներկայացվելուց ի վեր համալրվել է ևս յոթ համահեղինակով:
HR8141 օրինագիծը, որն իր տեսակի մեջ առաջինն է, ապրիլի 26-ին ներկայացրել են Նևադայից ընտրված դեմոկրատ Դինա Տիտուսը և 24 այլ համահեղինակներ, որոնց թիվն այսօր հասել է 31-ի:
Նախաձեռնությանը միացած կոնգրեսականների թվում են դեմոկրատներ Դենիել Քոլդմանը, Մայք Քուիգլին, Աննա Էշուն, Լինդա Սանչեսը, Ջուդի Չուն, Լորի Թրահանը և հանրապետական կոնգրեսական Միշել Սթիլը:
Օրինագիծը փոխանցվել է Կոնգրեսի արտաքին հարաբերությունների և դատական հանձնաժողովներին, սակայն հետագա քայլեր դեռ չեն ձեռնարկվել:
Օրենքի ընդունման դեպքում Կոնգրեսը Բայդենի վարչակազմից կպահանջի 180 օրվա ընթացքում հաստատել, թե արդյոք այդ 44 ադրբեջանցի պաշտոնյան ենթարկվո՞ւմ է «Մագնիտսկու ակտով» սահմանված պատժամիջոցներին՝ պատերազմին մասնակցելու և Ադրբեջանում քաղաքական ընդդիմության դեմ դաժան ճնշումների համար:
Հիշեցնենք, որ ցուցակում կա 44 մարդ՝ նախագահի աշխատակազմի անդամներ, ուժային կառույցների ներկայացուցիչներ, այդ թվում՝ բանակի, ՆԳՆ, գլխավոր դատախազության, պետական անվտանգության և սահմանային ծառայության ղեկավարությունը: