Ֆրանսիայի խորհրդարանը չի աջակցել վարչապետ Ֆրանսուա Բայրուի անվստահության քվեին, որը նախաձեռնել էր արմատական ձախակողմյան «Անհնազանդ Ֆրանսիա» կուսակցությունը, երբ Բայրուն օգտվելով սահմանադրական հոդվածից, բյուջեն ընդունել էր առանց պատգամավորների քվեարկության:
Կառավարության հրաժարականին կողմ է քվեարկել ընդամենը 128 պատգամավոր, մինչդեռ որոշում կայացնելու համար անհրաժեշտ է առնվազն 289 ձայն։ Մնացած բոլոր պատգամավորները չեն մասնակցել քվեարկությանը՝ հաղորդում է Le Monde-ը։ Ավելի ուշ պատգամավորները քվեարկել են կառավարությանն անվստահություն հայտնելու երկրորդ առաջարկի շուրջ, որը ստացել է ավելի քիչ ձայն՝ ընդամենը 122-ը:
«Անհնազանդ Ֆրանսիային» չեն աջակցել անգամ չորս ձախ կուսակցությունների կոալիցիայի անդամ սոցիալիստները։ Սոցիալիստական խմբակցության 66 անդամից միայն 6-ն է «կողմ» քվեարկել անվստահության քվեին, ինչն առաջացրել է մելանշոնիստների զայրույթը:
Ֆրանսուա Բայրուին «փրկելու» իրենց որոշումը սոցիալիստները բացատրել են վարչապետից ստացած զիջումներով: Բայրուն, օրինակ, համաձայնել է չդիպչել կրթական համակարգի 4 հազար աշխատատեղին, որոնք նախատեսված էր կրճատել։
Կառավարության նոր բյուջեի հիմնական կետը բյուջեի սրընթաց աճող դեֆիցիտի կրճատումն է, որը Ֆրանսիայում ավելի քան երկու անգամ գերազանցում է Բրյուսելի սահմանած շեմը ԵՄ երկրների համար։ Այդ նպատակին հասնելու համար Բայրուի կառավարությունը ծրագրել է կրճատել բյուջետային ծախսերը միլիարդավոր եվրոներով, բարձրացնել ընկերությունների գերշահույթների ու հարուստ ֆրանսիացիների եկամուտների հարկերը: