Ֆրանսիայի նախագահ Էմանուել Մակրոնը համոզված է, որ ԵՄ ապրանքների նկատմամբ ԱՄՆ-ի կողմից մաքսատուրքերի սահմանումը կարող է վնասել ամերիկյան տնտեսությանը` առաջացնելով ինֆլյացիայի աճ։ Երկուշաբթի՝ փետրվարի 10-ին, CNN-ի հետ հարցազրույցում Մակրոնը կոչ է արել Վաշինգտոնին ԵՄ-ի դեմ առևտրային պատերազմ սկսելու փոխարեն կենտրոնանալ Չինաստանի, Մերձավոր Արևելքի ճգնաժամի և Ուկրաինայի պատերազմի վրա։
«Եվրոպան ձեր դաշնակիցն է, և եթե ցանկանում եք, որ այն ավելի շատ ներգրավված լինի ներդրումների, պաշտպանության ու անվտանգության հարցերում, եթե հույս ունեք զարգացման, որը, ինչպես կարծում եմ, բխում է Միացյալ Նահանգների շահերից, պետք չէ մաքսատուրքերով սպառնալով՝ վնասել եվրոպական տնտեսությանը»,- ընդգծել է Ֆրանսիայի նախագահը։
Նախօրեին Թրամփը հայտարարել էր, որ առանց բացառության բոլոր երկրների համար Միացյալ նահանգներ պողպատի ու ալյումինի ներկրման համար 25 տոկոսի չափով մաքսատուրքեր կսահմանվեն: ԱՄՆ նախագահը մաքսատուրքերով սպառնացել է նաև Եվրամիությանը՝ վկայակոչելով Եվրոպայի հետ առևտրային դեֆիցիտի կրճատման անհրաժեշտությունը: ԵՄ-ը հայտարարել է, որ պատրաստ է հայելային պատասխանի: