ԱՄՆ նախագահ Դոնալդ Թրամփի հայտարարությունը Զելենսկու 4% վարկանիշի մասին չի համապատասխանում իրականությանը, լրագրողների հետ հանդիպման ժամանակ ասել է Ուկրաինայի նախագահը։
«Ներկայումս իմ վստահության վարկանիշը կազմում է 57%, այնպես որ, եթե ինչ-որ մեկը ցանկանում է փոխել ինձ հենց հիմա, չի ստացվի»,- ասել է Զելենսկին։ «Մենք տեսել ենք այդ 4% ապատեղեկատվությունը, և հասկանում ենք, որ դա գալիս է Ռուսաստանից: Ապացույցներ ունենք, որ Ամերիկան ու Ռուսաստանը քննարկում են այդ թիվը։ Ցավալի է, որ նախագահ Թրամփը հավատում է այդ ապատեղեկատվությանը»,- հավելել է նա։
Զելենսկու 4% վարկանիշի մասին Թրամփի խոսքերը չեն հաստատել Ուկրաինական սոցհարցումների տվյալները: Փետրվարի 4-9-ը Կիևի Սոցիոլոգիայի միջազգային ինստիտուտի անցկացրած վերջին հարցման արդյունքների համաձայն՝ նախագահ Զելենսկուն վստահում է հարցվածների 57%-ը, չի վստահում 37%-ը, մինչդեռ դեկտեմբերի համեմատ վստահության մակարդակը միայն աճել է (այն ժամանակ նրան վստահում էր 52%-ը, չէր վստահում 39%-ը):
Ավելի վաղ ԱՄՆ նախագահ Դոնալդ Թրամփը լրագրողներին ասել էր, թե Վոլոդիմիր Զելենսկու վարկանիշը, իբր, «իջել է 4%-ի», և որ Ուկրաինան ընտրությունների կարիք ունի։