Միացյալ Նահանգներն անհապաղ կվերականգնի Ուկրաինային ռազմական օգնության հատկացման գործընթացը, իսկ Ուկրաինան ընդունել է ՌԴ հետ 30-օրյա հրադադարի մասին ԱՄՆ առաջարկը։ Այս մասին նշված է Սաուդյան Արաբիայում ամերիկյան ու ուկրաինական պատվիրակությունների բանակցությունների արդյունքներով տարածված համատեղ հայտարարության մեջ։
Բացի այդ, ԱՄՆ-ն անհապաղ կվերսկի Ուկրաինայի հետ հետախուզական տվյալների փոխանակումը։ Ուկրաինայի նախագահի գրասենյակի ղեկավար Անդրեյ Երմակը հայտարարել է, որ Ուկրաինան «պատրաստակամություն է հայտնել» ընդունել 30-օրյա հրադադարի մասին ԱՄՆ առաջարկը, որը կարող է երկարաձգվել՝ կողմերի փոխադարձ համաձայնության դեպքում։
«ԱՄՆ-ն Մոսկվային կտեղեկացնի, որ ՌԴ կողմից փոխադարձությունն է խաղաղության հասնելու բանալին»,- ասել է նա։ Պատվիրակությունները նաև քննարկել են Կիևի ու Մոսկվայի միջև ռազմագերիների փոխանակման և բռնի տեղահանված ուկրաինացի երեխաների վերադարձի հարցը։
ԱՄՆ-ն պարտավորվել է այս հարցերը քննարկել ՌԴ ներկայացուցիչների հետ։ Բանակցությունների արդյունքում կողմերը նաև պայմանավորվել են հնարավորինս շուտ համաձայնագիր ստորագրել ուկրաինական օգտակար հանածոների համատեղ արդյունահանման մասին։
Financial Times-ի տվյալներով՝ բանակցությունների շարունակություն չի նախատեսվում, ինչպես ավելի վաղ էր հայտարարվել։