Վրաստանում Մեծ Բրիտանիայի դեսպան Գարեթ Ուորդը կանչվել է Վրաստանի արտաքին գործերի նախարարի առաջին տեղակալ Գիորգի Զուրաբաշվիլիի հետ հանդիպման, հայտարարել է Արտաքին գործերի նախարարությունը։
Նախարարության տվյալներով՝ հանդիպմանը քննարկվել են Վրաստանի կողմից միջազգային պատժամիջոցների ռեժիմների պահպանմանը և այս հարցում Վրաստանի կառավարության ու համապատասխան պետական մարմինների աշխատանքին վերաբերող հարցեր։
«Նշվեց, որ այն պայմաններում, երբ Վրաստանի կողմից միջազգային պատժամիջոցների խախտման որևէ ապացույց չկա, և Վրաստանի կառավարությունը սահուն համագործակցում է միջազգային գործընկերների հետ, անհասկանալի են այս հարցի շուրջ անընդհատ շահարկումները։
Այս համատեքստում մտահոգիչ է Մեծ Բրիտանիայի կողմից SILVAR (IMO 9291262) նավի նկատմամբ պատժամիջոցների կիրառման հարցի վերաբերյալ դեսպանատան կողմից տարածված հայտարարության մեջ Վրաստանի վրա շեշտադրումը, որը միտումնավոր ծառայում է թյուրըմբռնումների ամրապնդմանը և Վրաստանի շահերին վնաս հասցնելուն։
Առաջին փոխնախարարը նշեց, որ դեսպանատան կողմից տարածված հայտարարության մեջ Վրաստանի հիշատակումն անընդունելի է, երբ նավի Վրաստան մուտք գործելու և շահագործելու պահին նրա դեմ միջազգային պատժամիջոցներ չեն եղել, այն ուներ գործող Lloyd’s Register (Միացյալ Թագավորություն) դաս, գործել է բազմաթիվ միջազգային ծովային առևտրային երթուղիներում և այցելել է ինչպես եվրոպական, այնպես էլ ասիական և աֆրիկյան նավահանգիստներ, այդ թվում՝ Մալթա, Դանիա (Սկագեն), Եգիպտոս, Մալայզիա, Հնդկաստան, Չինաստան և այլն։ Բացի այդ, Վրաստանի բոլոր իրավասու մարմինները գործել են գործող ազգային և միջազգային պարտավորություններին լիովին համապատասխան։
Բրիտանական կողմը նաև լավ գիտակցում է, որ Վրաստան մուտք գործելուց ընդամենը մի քանի շաբաթ առաջ տվյալ նավը ենթարկվել է նավահանգստային պետական վերահսկողության ստուգման։ Դանիայի Թագավորությունում, որի ընթացքում նավը չի կալանավորվել, ինչը հաստատում է դրա համապատասխանությունը միջազգային ծովային անվտանգության և տեխնիկական վերահսկողության պահանջներին։
Մեծ Բրիտանիայի դեսպանի հետ զրույցում Գիորգի Զուրաբաշվիլին նշել է, որ դեսպանատան հայտարարության ոգին անընդունելի է, և որ նման մանիպուլյատիվ գործողությունները ստվեր են գցում Վրաստանի և Միացյալ Թագավորության միջև հարաբերությունների վրա։ Հանդիպման ավարտին ընդգծվել է կառուցողական համագործակցության կարևորությունը», — ասվում է Վրաստանի արտաքին գործերի նախարարության հայտարարության մեջ։
Նշենք, որ Վրաստանում Մեծ Բրիտանիայի դեսպան Գարեթ Ուորդը 2026 թվականի փետրվարի 26-ին կանչվել է Վրաստանի արտաքին գործերի նախարարի հետ հանդիպման՝ վրացական հեռուստաընկերությունների՝ «Իմեդի»-ի և «POSTV»-ի՝ Ռուսաստանի դեմ Միացյալ Թագավորության իշխանությունների կողմից սահմանված պատժամիջոցների փաթեթում ներառման վերաբերյալ։