ԱՄՆ դեսպանատունն իր քաղաքացիներին կոչ է արել անհապաղ լքել Բելառուսը: Այս մասին ծանուցումը հրապարակված է դեսպանատան կայքում:
Որպես նման նախազգուշացման պատճառ նշվում է Լիտվայի` վերջերս ընդունված որոշումը` Բելառուսի հետ սահմանային երկու անցակետերը փակելու մասին, ինչպես նաև Լիտվայի, Լատվիայի ու Լեհաստանի հայտարարությունն այն մասին, որ դիտարկում են բելառուսական սահմանի ամբողջական փակման հնարավորությունը:
Դեսպանությունը հիշեցրել է, որ Լեհաստանը փակել է սահմանային անցակետը, ինչպես նաև կոչ արել երկիրը լքելիս չանցնել Ռուսաստանով կամ Ուկրաինայով:
Այն քաղաքացիներին, որոնք ծրագրում են այցելել Բելառուս, դեսպանությունը հիշեցրել է, որ խնդիրների դեպքում ԱՄՆ կառավարությունը չի կարող աջակցություն տրամադրել։